सांगली : शहरातील स्टेशन चौकात असलेल्या गणेश मार्केटमधील व्यापाऱ्यांना चाकूच्या धाकाने लुटणाऱ्या संशयितांना अटक करण्यात आली. अरबाज अस्लम खान (वय २१), अक्षय संतोष निकम (२१), करण प्रकाश गोसावी (२३, तिघेही रा. गल्ली क्रमांक पाच, प्रकाशनगर, अहिल्यानगर, सांगली) अशी संशयितांची नावे आहेत. स्थानिक गुन्हे अन्वेषणसह शहर पोलिसांनी ही कारवाई केली.
पोलिसांनी दिलेली माहिती अशी की, मंगळवारी संशयितांनी गणेश मार्केटमध्ये येत दहशत माजविली होती. हातातील चाकू काऊंटरवर ठेवून दुकानातील साहित्य धाकाने घेतले जात होते. नरेश भरतकुमार धनवाणी यांच्या दुकानातून ८०० रुपयांचा शर्ट घेण्यात आला. त्यानंतर आनंद लक्ष्मणदास धनवाणी यांच्या दुकानात संशयित गेले. त्याठिकाणाही साडेपाचशे रुपयांचा गॉगल अशाचप्रकारे घेण्यात आला. त्याचवेळेत बलराज गोपीचंद धनवाणी यांच्या होजिअरी दुकानातून १२०० रुपयांचे जॅकेट नेण्यात आले. तेथून पुढे सलमान इस्लामअली शेख यांच्या कपड्याच्या दुकानातून साडेतीनशे रुपयांची जीन्स पॅन्टही संशयितांनी चोरून नेली.
दिवसभरात चाकूच्या धाकाने लुटीचा प्रकार घडल्यानंतर व्यवसायिकांनी शहर पोलीस ठाणे गाठत तक्रार दाखल केली.
त्यानंतर एलसीबीसह शहर पोलिसांचे पथकाने तिघांना अटक केली. यात शहर पोलिसांच्या पथकाने करण गोसावी यास अटक केली. एलसीबीच्या पथकाने अरबाज खान आणि अक्षय निकम यांना कुपवाडमधील चाणक्‍य चौकातून ताब्यात घेतले. या संशयितांकडून आणखी काही गुन्हे उघडकीस येण्याची शक्‍यता आहे. एलसीबीचे निरीक्षक सर्जेराव गायकवाड, शहरचे निरीक्षक अजय सिंदकर यांच्या नेतृत्वाखालील पथकाने ही कारवाई केली.