लोकमत न्यूज नेटवर्क
शिराळा : सर्वांना समान न्याय दिला जाणार असल्याने जे लॉकडाऊनचे पालन करणार नाहीत, त्यांच्यावर कडक कारवाई करण्याचा इशारा तहसीलदार गणेश शिंदे यांनी दिला.
व्यापारी असोसिएशनच्या सभागृहात आयोजित बैठकीत तहसीलदार शिंदे बोलत होते. यावेळी नगराध्यक्षा सुनीता निकम, पोलीस निरीक्षक सुरेश चिल्लावार, मुख्याधिकारी योगेश पाटील, तालुका आरोग्य अधिकारी डॉ. प्रवीण पाटील यांची प्रमुख उपस्थिती होती. तहसीलदार शिंदे म्हणाले, कोरोनाचा प्रादुर्भाव दिवसेंदिवस वाढू लागल्याने लॉकडाऊनच्या नियमांचे पालन करणे गरजेचे आहे. तालुक्यातील प्राथमिक आरोग्य केंद्र, उपकेंद्रासह दोन खासगी रुग्णालयांसह ३७ ठिकाणी लसीकरण सोय केली आहे. लसीबाबत भीती बाळगण्याची गरज नाही. सर्वांनी लस घ्या, लॉकडाऊनची कडक अंमलबजावणी करा, अत्यावश्यक सेवावगळता सर्व व्यवहार बंद राहतील. सर्वांना समान न्याय दिला जाणार असल्याने जे पालन करणार नाहीत, त्यांच्यावर कडक कारवाई केली जाईल. वैद्यकीय अधिकारी उपलब्ध झाल्याने छोटे व्हेंटिलेटर सुरू राहतील. लस संपली असून दोन दिवसात उपलब्ध होईल.
डॉ.प्रवीण पाटील म्हणाले, २२ हजार लसीकरण झाले आहे. शिराळा येथे दोन हजार लसीकरण झाले आहे. मृत्युदर कमी करण्यासाठी लसीकरण महत्त्वाचे आहे. आजअखेर ९७ रुग्ण कोरोनामुळे दगावले आहे.
यावेळी विश्वास कदम, अमोल पारेख, विश्वप्रताप नाईक, उत्तम डांगे, नेहा सूर्यवंशी, सीमा कदम, वसंत कांबळे, किशोर यादव, उमेश कुलकर्णी, राहुल भुरके आदी उपस्थित होते.