घाटनांद्रे : सध्या राज्यभरात कोरोनाचा हाहाकार सुरू आहे. या पार्श्वभूमीवर काही अपवाद वगळता सर्व एसटी बस सेवा बंद आहेत. या विभागाकडे काम करणारे ग्रामीण भागातील वाहक, चालक कर्मचारी सध्या घरी असल्याने आता त्यांनी शेती व शेतीशी निगडित कामात गुंतल्याचे चित्र दिसत आहे.
गतवर्षी मार्च महिन्यापासून लॉकडाऊनचा कालावधी सुरू झाला होता. त्यावेळी एसटी बस सेवा बंद करण्यात आली होती. त्यानंतर सुमारे सहा महिन्यांच्या कालावधीनंतर पुन्हा एसटी बस सेवा सुरू झाली. दरम्यान पुन्हा कोरोना महामारीची दुसरी लाट आल्याने १४ एप्रिलपासून पुन्हा कडक निर्बंध लावण्यात आले. यामुळे पुन्हा एकदा एसटी बस वाहतूक बंद करण्यात आली आहे. काही अपवाद वगळता एसटी बसेस सुरु आहेत, मात्र त्यासाठी मोजकेच चालक, वाहक ड्यूटीवर कार्यरत आहेत. तर उर्वरित कर्मचारी रिकाम्या वेळात शेतीमध्ये गुंतले आहेत.