---------------
कार्यालयांतील सॅनिटायझर मशीन बंद
सांगली : मागील वर्षी कोरोनाच्या संसर्गामुळे प्रत्येक शासकीय कार्यालयात सॅनिटायझर मशीन बसविण्यात आली होती. मात्र हा संसर्ग कमी झाल्यानंतर ही मशीन बंद पडली. आता पुन्हा रुग्णांची संख्या वाढली आहे; मात्र तरीही काही शासकीय कार्यालयांतील सॅनिटायझर मशीन बंदच आहे. प्रशासनाने याकडे लक्ष द्यावे, अशी मागणी होत आहे.
------------
कुत्र्यांच्या झुंडी
सांगली : शहरात जागोजागी कुत्र्यांच्या झुंडी फिरत आहेत. या झुंडीतील श्वान वाहनधारकांवर हल्ला करताना पाहायला मिळत आहेत. रस्त्याने चालणाऱ्या लोकांना देखील या सर्वांचा त्रास सोसावा लागत आहे. पालिकेने याबाबत डोळे झाकून घेतले आहेत.
-------------------
ई-सेवेबाबत प्रशिक्षण शिबिर
सांगली : आजचे युग हे डिजिटल युग आहे. सर्वच क्षेत्रात संगणकाचा वापर मोठ्या प्रमाणात होत आहे. मात्र ग्रामीण भागात संगणक प्रशिक्षण संदर्भात कोणत्याही प्रशिक्षण संस्था नसल्याने अडचण होत आहे. त्यामुळे ई-सेवा साक्षरता प्रशिक्षण शिबिर राबवावे, अशी मागणी होत आहे.
-------------------
धूर फवारणी करण्याची मागणी
शिराळा : शहरातील काही वाॅर्डात डासांची उत्पत्ती मोठ्या प्रमाणात वाढली आहे. कोरोना आजाराच्या प्रतिबंधासाठी शहरात जागृती केली जात आहे. मात्र, कोरोनासह इतर आजार वाढण्याची शक्यता आहे. त्यामुळे नगर परिषद प्रशासनाने शहरातील वाॅर्डांमध्ये धूर फवारणी करून डासांचा बंदोबस्त करावा, अशी मागणी केली जात आहे.
----------------
वाहनधारक बिनधास्त
मिरज : संचारबंदीच्या काळात विनाकारण फिरणाऱ्या वाहनचालकांवर पोलीस प्रशासन दंडात्मक कारवाई करत आहे. तरीही काही वाहनधारक बिनधास्तपणे फिरताना दिसून येत आहे. कोरोनाची कोणतीही भीती त्यांना नसल्याचे चित्र पहायला मिळत आहे.
-----------------
उकाड्याने केले हैराण
आटपाडी : सध्या तापमानाचा पारा वाढू लागला आहे. उन्हाच्या कडाक्याबरोबरच घामाच्या धारांनी नागरिकांना असह्य केले आहे. घशाला कोरड कायम पडलेली आहे. एप्रिल महिन्यातील उष्मा त्रासदायक होत असून, सध्या कोरोनामुळे शीतपेय पितानाही नागरिकांना भीती वाटत आहे.
-------------
फिरत्या विक्रेत्यांचे नुकसान
कडेगाव : सध्या लाॅकडाऊनमुळे सर्वच दुकाने बंद आहेत. रस्त्यावरील फेरीवाले, फळ तसेच रस विक्रेते यांनाही आता रस्त्यावर विक्री करण्यास मनाई करण्यात आली आहे. त्यामुळे हातावर पोट असलेल्या या विक्रेत्यांचा व्यवसायच ठप्प झाला असून, त्यांच्यावर उपासमारीची वेळ आली आहे.
------------------
उद्यानांमध्ये शुकशुकाट
सांगली : सध्या कोरोनामुळे लाॅकडाऊन सुरू झाले आहे. त्यामुळे शासनाने सार्वजनिक ठिकाणांवरही बंदी आणली आहे. त्यामुळे आता उद्याने बंद आहेत. बालके सध्या घरात बसून कंटाळली असली, तरी त्यांना उद्यानात जाता येत नाही. मुलांअभावी या उद्यानात सध्या शुकशुकाट पसरला आहे.