सांगली : शहरातील खणभागातील बिरंगे गल्लीत दुचाकीवरून आलेल्या चोरट्याने ‘धूम स्टाईल’ने महिलेच्या गळ्यातील अडीच तोळ्यांचे गंठण हिसडा मारून लांबविले. सोमवारी सकाळी साडेसातच्या सुमारास ही चोरी झाल्याने खळबळ उडाली आहे. साक्षी सूरज बसणवकर (२६, रा. कडलास्कर गल्ली, खणभाग) यांनी फिर्याद दिली. त्यानुसार अज्ञातांविरोधात शहर पोलीस ठाण्यात गुन्हा दाखल करण्यात आला.
साक्षी बसणवकर खणभागातील कडलास्कर गल्लीत राहतात. सोमवारी सकाळी त्या दिरासोबत सासूकडे निघाल्या होत्या. भारत चौकातून घरी जात असताना पाठीमागून दुचाकीवरुन चोरटा आला. त्याने साक्षी यांच्या गळ्यातील गंठण हिसडा मारून लंपास केले. साक्षी यांनी आरडाओरड केल्याने चोरट्याने धूम ठोकली. परिसरातील लोक जमा झाले. त्यांनी शहर पोलिसांना माहिती दिली. त्यानंतर पोलीस घटनास्थळी दाखल झाले. चोरट्यांचा शोध घेण्याचा प्रयत्न केला. अखेर अज्ञातावर गुन्हा दाखल करण्यात आला. दरम्यान, भरवस्तीत ही घटना घडल्याने खळबळ उडाली आहे.