कडेगाव : कडेगाव नगरपंचायतीच्या नगराध्यक्षपदी संगीता राजेंद्र राऊत यांची, तर उपनगराध्यक्षपदी दिनकर चंदर जाधव यांची बिनविरोध निवड झाली.
कडेगाव नगरपंचायतीवर काँग्रेस नेते आणि राज्यमंत्री डॉ. विश्वजित कदम यांचे वर्चस्व आहे. कडेगावचे नगराध्यक्षपद सर्वसाधारण महिलांसाठी आरक्षित आहे. येथील नगराध्यक्षा नीता देसाई आणि उपनगराध्यक्ष राजू जाधव यांनी ठरलेली मुदत संपल्याने पदाचा राजीनामा दिला होता. त्यामुळे रिक्त झालेल्या या पदांसाठी निवड प्रक्रिया झाली. नगराध्यक्ष पदासाठी संगीता राऊत यांचा आणि उपनगराध्यक्ष पदासाठी दिनकर जाधव यांचा प्रत्येकी एकच अर्ज दाखल झाल्याने दोन्ही पदांसाठीची निवड प्रक्रिया बिनविरोध झाली. पीठासन अधिकारी म्हणून प्रांताधिकारी डॉ. गणेश मरकड यांनी काम पाहिले. यावेळी मुख्याधिकारी कपिल जगताप यांच्यासह नगरसेवक उपस्थित होते.
निवडीनंतर कार्यकर्त्यांनी फटाक्यांची आतषबाजी व गुलालाची उधळण करून आनंद व्यक्त केला. राज्यमंत्री डॉ. विश्वजित कदम, आमदार मोहनराव कदम, सागरेश्वर सूतगिरणीचे अध्यक्ष शांताराम कदम यांच्यासह कडेगाव येथील काँग्रेस पदाधिकारी आणि कार्यकर्त्यांनी नूतन नगराध्यक्षा संगीता राऊत व उपनगराध्यक्ष दिनकर जाधव यांचे अभिनंदन केले.