मालगाव ग्रामपंचायतीची ग्रामसभा सरपंच अनिता क्षीरसागर यांच्या अध्यक्षतेखाली व उपसरपंच तुषार खांडेकर यांच्या उपस्थितीत पार पडली. सभेत पाणीपुरवठा निधीच्या खर्चाबाबत तुषार खांडेकर व प्रदीप सावंत यांनी ग्रामविकास अधिकारी सुनील कोरे यांना जाब विचारला. कोरे यांच्याकडून समाधकारक उत्तर न मिळाल्याने खांडेकर व सावंत यांनी खर्चावर संशय व्यक्त केला. ग्रामस्थांतूनही ग्रामविकास अधिकाऱ्यांविरोधात तक्रारीचा पाढा वाचला. कोरे यांच्या बदलीचा ठराव विश्वास खांडेकर व स्वप्निल खांडेकर यांनी मांडला. त्यास मंजुरी मिळाली.
सुभाषनगर येथील मुनाप मालगावे सभेत प्रश्न विचारत असताना सरपंचांऐवजी त्यांचे पती उत्तरे देण्याचा प्रयत्न करू लागले. यातून मालगावे व सरपंचांच्या पतीत वाद झाला. यापुढे ग्रामपंचायतीच्या कारभारात सरपंचांच्या पतीचा हस्तक्षेप झाल्यास याविरोधात मुख्य कार्यकारी अधिकाऱ्यांकडे दाद मागण्याचा निर्णय घेण्यात आला. सभेस प्रदिप सावंत, शशिकांत कनवाडे, अजित भंडे, कपिल कबाडगे, राजू भानुसे, संजय खोलकुंबे, पोलिसपाटील अश्विनी कबाडगे यांच्यासह ग्रामपंचायत सदस्य व ग्रामस्थ उपस्थित होते.
चौकट
सहीसाठी पैसे
ग्रामविकास अधिकारी सुनील कोरे यांनी रोजगार हमीच्या जॉबकार्डवर सहीसाठी पैसे मागितल्याचा दिनेश कोकणे यांनी आरोप केला. यामुळे सभेत कोरे यांच्या अडचणीत भर पडली. कोरे यांनी यावर बोलण्याचा प्रयत्न केला मात्र तो निष्फळ ठरला.