सांगली : राष्ट्रवादी काँग्रेसचे अध्यक्ष खासदार शरद पवार यांच्या आवाहनाला प्रतिसाद देत राजारामबापू साखर कारखान्याने (साखराळे, ता. वाळवा) ऑक्सिजन प्रकल्प उभा करण्याची तयारी ठेवली आहे. सोमवारी संचालक मंडळाच्या बैठकीत चर्चाही झाली आहे. तसेच जिल्ह्यातील विश्वासराव नाईक, सोनहिरा आणि क्रांती कारखान्यानेही ऑक्सिजन प्रकल्प उभारणीसाठी हालचाली सुरू केल्या आहेत.
कोरोनाच्या दुसऱ्या लाटेमुळे राज्यात गंभीर परिस्थिती निर्माण झालेली आहे. कोविड रुग्णांना ऑक्सिजनची गरज मोठ्या प्रमाणात भासू लागलेली आहे. राज्यात दररोज हजारो रुग्ण आढळत असल्याने ऑक्सिजनचा तुटवडा जाणवत आहे. या गंभीर परिस्थितीचा विचार करूनच शरद पवारांनी राज्यातील कारखान्यांना ऑक्सिजन निर्मिती आणि पुरवठा करण्याच्या सूचना दिल्या आहेत. त्यानुसार चोराखळी (ता. कळंब, जि. उस्मानाबाद) येथील धाराशिव कारखान्याने ऑक्सिजन निर्मितीचा पहिला प्रकल्प उभारण्याच्या कामास गती दिली आहे. धाराशिव कारखान्यानंतर जिल्ह्यातील राजारामबापू पाटील कारखान्याने साखराळे येथे ऑक्सिजन निर्मिती प्रकल्प सुरू करण्याचे ठरविले आहे.
सोमवारी संचालक मंडळाच्या बैठकीत चर्चा झाली आहे. ऑक्सिजन निर्मिती प्रकल्प उभा करण्यासाठी खर्च किती येईल, प्रतिदिन किती ऑक्सिजन तयार करावा, यासह कोरोनाची लाट संपल्यानंतर या ऑक्सिजनचा उद्योगाला पुरवठा करता येईल का, या सर्व मुद्द्यांवर संचालक मंडळाच्या बैठकीत चर्चा झाली आहे. तांत्रिक सल्लाही खासगी कंपनीकडून घेण्यात येणार आहे. त्यानंतर तीन दिवसात ऑक्सिजन निर्मिती प्रकल्प सुरू करण्याबाबत निर्णय घेणार आहे, अशी माहिती राजारामबापू कारखान्याचे कार्यकारी संचालक आर. डी माहुली यांनी दिली.
सोनहिरा (वांगी, ता. कडेगाव), क्रांती (कुंडल, ता. पलूस), विश्वासराव नाईक (चिखली, ता. शिराळा) कारखान्यांनीही ऑक्सिजन प्रकल्प उभारण्यासाठी प्रयत्न चालू केले आहेत.
चौकट
कारखान्यांकडे इथेनॉल प्रकल्प सुरू आहे. या प्रकल्पामध्ये जुजबी फेरफार करून अतिरिक्त सामग्रीत ‘माॅलेक्युलर सिव्ह' वापरून हवेतील वायुव्दारे ऑक्सिजनची निर्मिती करता येऊ शकते. प्रत्येक साखर कारखाना प्रतिदिन १६ ते २० टन ऑक्सिजन निर्मिती करू शकतो, असे जाणकारांचे मत आहे.
चौकट
ऑक्सिजन प्लँट उभारणीबाबत विचार : मानसिंगराव नाईक
ऑक्सिजन प्रकल्पासाठी खर्च किती येईल, कोटीत खर्च असेल तर शासन काय मदत करेल का, या सर्व गोष्टींचा आम्ही विचार करत आहे. येत्या चार दिवसात ऑक्सिजन प्रकल्प उभा करण्याबाबत निर्णय घेण्यात येईल, अशी प्रतिक्रिया विश्वासराव नाईक कारखान्याचे अध्यक्ष आ. मानसिंगराव नाईक यांनी दिली.