कोकरूड : कोल्हापूर येथील गोकुळ दूध संघाच्या निवडणुकीतील ठरावधारक असलेले सात मतदार दोन वेगवेगळ्या माेटारीतून गुरुवारी चांदोली परिसरात पर्यटनासाठी दाखल झाले. मात्र त्यापूर्वीच सांगली जिल्ह्यातील काही ‘राजकीय पर्यटकांना’ पोलिसांनी पकडल्याची बातमी पसरली आणि गोकुळच्या मतदारांना आल्या पावली परतावे लागले.
कोल्हापूर जिल्ह्यातील गोकुळ दूध संघाची पंचवार्षिक निवडणूक सुरी आहेत. ठरावधारक असलेल्या मतदारांच्या वैयक्तिक भेटीगाठी सुरु आहेत. या दूध संघाचे सात ठरावधारक मतदार बांबवडेमार्गे चांदोली परिसरात पर्यटनाच्या निमित्ताने आले होते. एके ठिकाणी ते सर्वजण थांबले असताना सांगली जिल्ह्यातील भाजप, काँग्रेससह अन्य पक्षांचे कार्यकर्ते, दोन अधिकाऱ्यांना चांदोली धरणाच्या पायथ्याशी मद्यधुंद पार्टीमध्ये धिंगाणा करताना कोकरूड पोलिसांनी पकडल्याची बातमी आली. त्यांच्यावर कारवाई सुरू असल्याचे समजताच गोकुळच्या या सात ठरावधारकांनी पर्यटनाचा आनंद घेणे दूरच. मात्र भीतीपोटी आल्या पावली परतीचा रस्ता धरला.
पर्यटनानिमित्ताने आलेल्या गोकुळच्या मतदारांना कसलीच मौजमजा न करता परत जावे लागल्याने त्यांच्यासोबत आलेल्या कार्यकर्त्यांचीही निराशा झाली.
दरम्यान चांदोली धरणाच्या पायथ्याशी मद्यपार्टी करून धिंगाणा केल्याप्रकरणी तसेच महिलेस अश्लील हावभाव केल्याप्रकरणी महेश कुमार रवींद्र जगताप (रा. सुखवाडी, ता. पलूस), योगेश विजय कुलकर्णी (रा. सागाव, ता. शिराळा), रवींद्र तानाजी सावंत (रा. जत) यांच्याविराेधात गुन्हा दाखल झाला आहे. याबाबत मणदूर (ता. शिराळा) येथील महिलेने विनयभंगाची तक्रार दिली आहे. त्यांची जामिनावर मुक्तता करण्यात आली आहे. या प्रकरणाचा अधिक तपास सहायक पोलीस निरीक्षक ज्ञानदेव वाघ यांच्या मार्गदर्शनाखाली पोलीस नाईक हेमंत तांबे-वाघ करत आहेत.