तासगाव : मुख्यमंत्री उद्धव ठाकरे यांनी सचिन वाझे यांच्या माध्यमातून, माजी गृहमंत्री अनिल देशमुख यांनी संजीव पलांडे यांच्या, तर परिवहन मंत्री अनिल परब यांनी बजरंग खरमाटे या अधिकाऱ्याच्या माध्यमातून कोट्यवधी रुपयांची बेनामी संपत्ती गोळा केली आहे. परब यांचे सचिव तथा आरटीओ खरमाटेकडे ७५० कोटीची बेनामी मालमत्ता आहे, असा आरोप भाजपचे नेते, माजी खासदार किरीट सोमय्या यांनी सोमवारी केला.
परिवहन अधिकारी बजरंग खरमाटे यांच्या वंजारवाडी (ता. तासगाव) येथील फार्म हाउसची आणि विट्यातील पाईप कारखान्याची पाहणी करण्यासाठी किरीट सोमय्या भाजपचे नेते मकरंद देशपाडे यांच्यासमवेत आले हाेते. सकाळी साडेदहा वाजता त्यांनी वंजारवाडीस आणि त्यानंतर विट्यास भेट दिली.
खरमाटे यांना ईडीने समन्स बजावून चौकशीसाठी बाेलावले आहे. याबाबत सोमय्या म्हणाले, माझ्या माहितीप्रमाणे ईडीच्या अधिकाऱ्यांकडे खरमाटे यांच्या ७५० कोटी रुपयांच्या बेनामी मालमत्तेची माहिती आहे. त्याचीच चौकशी सुरू झाली आहे. परिवहन मंत्री अनिल परब यांचेही काउंटडाउन सुरू झाले आहे. सांगली जिल्ह्यात चार ठिकाणी खरमाटे यांची बेनामी मालमत्ता आहे. एका ठिकाणी १५० एकर जमीन आहे, तर औद्योगिक वसाहतीमध्ये पाच एकर जागेवर एक कंपनी आहे. वंजारवाडी गावात आलिशान फार्म हाउस आहे. या कोट्यवधीच्या बेनामी संपत्तीची पाहणी करण्यासाठी आलो आहे. वंजारवाडी येथील फार्म हाउसची किंमत २० ते २२ कोटी रुपये आहे. परिवहन अधिकारी असे आलिशान फार्म हाउस कसे बांधू शकतो? बेनामी फार्म हाउस खरमाटे यांचेच आहे की परिवहन मंत्री अनिल परब यांचे आहे, हे पाहण्यासाठी आलो आहे.
चौकट :
दोन अनिल जेलमध्ये जाणार
बजरंग खरमाटे हे परिवहन मंत्री अनिल परब यांचे सचिव आहेत. त्यांची बेनामी संपत्ती परब यांचीच असण्याचा दाट संशय आहे. याची चौकशी व्हावी, अशी मागणी ईडी, सीबीआय आणि लाचलुचपत प्रतिबंधक विभागाकडे करणार आहे. ठाकरे सरकारचा एक अनिल (माजी गृहमंत्री अनिल देशमुख) जेलच्या दरवाजात उभा आहे, तर दुसरा अनिल (परिवहनमंत्री अनिल परब) जेलमध्ये जाण्याचा मुहूर्त शोधत आहे. हे दोन्ही अनिल लवकरच जेलमध्ये जाणार असल्याचे सोमय्या म्हणाले.