पलूस : मिनी लॉकडाऊनला व्यापाऱ्यांचा विरोध नाही, पण सरसकट जो बंद पुकारला, कोणत्याही व्यापाऱ्यांना विश्वासात न घेता घेतलेल्या निर्णयाला पूर्णपणे विरोध आहे. सोमवार, दि. १२ एप्रिलपर्यंत जर हा निर्णय पाठीमागे घेतला नाही, तर मंगळवारपासून व्यापारी लॉकडाऊन पाळणार नाहीत. सर्व व्यापारी सुरळीत व्यापार चालू ठेवणार आहेत. हवे तर सर्व व्यापाऱ्यांवर शासनाने कारवाई केली तर चालेल, असा निर्णय गुरुवारी पलूस येथील व्यापारी संघटनेच्या बैठकीत घेण्यात आला.
बैठकीत व्यापारी म्हणाले की, व्यापाऱ्यांनी विरोध दर्शवला असला तरी आज शासकीय नियमांचा आदर राखून दोन दिवस दुकाने बंद ठेवली आहेत. यापुढे कोणताही व्यापारी लॉकडाऊनचा भार सहन करू शकणार नाही. कारण आजवर हा व्यापारीवर्ग नेहमी दुर्लक्षित राहिला आहे. मागील कोरोनाच्या काळात व्यापाऱ्यांनी उत्स्फूर्तपणे मदतकार्य केले, पण यावेळी हा व्यापारी पुरता धास्तावला आहे. या व्यापारावर अनेक कुटुंबे अवलंबून असल्याने त्यांची आर्थिक घडी विस्कटली आहे. हे लॉकडाऊनचे नियमन करत असताना कर्जाचे हप्ते थांबत आहेत. यामुळे आम्ही मंगळवारपासून शासनाचा कुठल्याही निर्णयाचे पालन करणार नाही. शासनाने लॉकडाऊन करण्याऐवजी शंभर टक्के माेफत औषध उपचार करून नागरिकांना बरे करण्याची गरज आहे. सामान्य नागरिकांचीही लॉकडाऊनमध्ये फरफट होत असल्यामुळे आम्ही दोन दिवसांत या निर्णयाच्या विरोधात पाऊल उचलू, असा इशाराही व्यापाऱ्यांनी दिला.
यावेळी व्यापारी संघटनेचे अध्यक्ष कुमार माळी, दिलीप येसुगडे, संभाजी सूर्यवंशी, सोमनाथ होमकर, सुभाष कदम, सयाजी गायकवाड, बाळासाहेब अर्जुन, संदीप सिसाळ, कुमार कांबळे, जगदीश पाटील आदींसह व्यापारी उपस्थित होते.