जत : जत ते अथणी रस्त्यावर जतपासून सुमारे तीन किलोमीटर अंतरावर अज्ञात दुचाकीने धडक दिल्याने एकाचा जागीच मृत्यू झाला. श्रीशैल बाळाप्पा चिंतामणी (वय ६०, रा. वज्रवाड, ता. जत) असे मृताचे नाव आहे. ही घटना बुधवारी दुपारी साडेतीन वाजण्याच्या दरम्यान घडली. याप्रकरणी जत पोलिसात अपघाताचा गुन्हा दाखल करण्यात आला आहे.
श्रीशैल चिंतामणी हे बुधवारी दुपारी साडेतीन वाजता जत ते अथणी मार्गावरून वज्रवाडहून जतकडे बॅंकेच्या कामासाठी येत होते. यावेळी समोरून येणाऱ्या एका अज्ञात दुचाकीने त्यांच्या दुचाकीस जोरदार धडक दिली. त्यामुळे चिंतामणी हे दुचाकीसह रस्त्याकडेला जाऊन पडले. त्यांचे डोके दगडावर आपटल्याने गंभीर दुखापत झाली. यावेळी मोठा रक्तस्त्राव झाला.
या घटनेबाबत नागरिकांनी पोलिसांना माहिती दिली. पोलिसांनी तात्काळ घटनास्थळाला भेट दिली. धडक देऊन पलायन केलेल्या अज्ञात वाहन चालकाचा शोध घेण्याचा प्रयत्न त्यांनी केला; परंतु त्याचा शोध लागला नाही. या प्रकरणाचा पुढील तपास पोलीस हवालदार बजरंग थोरात करत आहेत.
चाैकट
हेल्मेट असते तर...
श्रीशैल चिंतामणी यांनी डोक्यवर हेल्मेट परिधान केले नव्हते. यामुळे अपतातात त्यांच्या डोक्याला गंभीर दुखापत होऊन त्यांचा मृत्यु झाला. जर त्यांनी हेल्मेटचा वापर केला असता, तर त्यांचे प्राण वाचले असते.