कापूसखेड येथे विजेचा धक्का लागून खाली पडल्याने गंभीर जखमी झालेले माकड. दुसऱ्या छायाचित्रात त्याच्यावर शस्त्रक्रिया करण्यात आली.
लोकमत न्यूज नेटवर्क
इस्लामपूर : कापूसखेड (ता. वाळवा) येथे झाडांवर खेळणाऱ्या माकडांच्या कळपातील तीन माकडांना विजेच्या तारेचा धक्का बसला. यातील दोन माकडांना किरकोळ दुखापत झाली. त्यामुळे त्यांनी धूम ठोकली, तर एका माकडाचा हात भाजून ते खाली पडल्याने त्याच्या पोटाला गंभीर इजा झाली. त्यातून त्याची आतडी बाहेर आली होती. ही घटना मंगळवारी दुपारी दोनच्या सुमारात घडली. त्याचवेळी वन विभागाला ही माहिती देण्यात आली. मात्र घटनास्थळी तब्बल पाच तास उशिरा येऊन वन विभागाच्या कर्मचाऱ्यांनी मर्कटलीला केल्या.
माजी सरपंच प्रदीप पाटील यांच्या घराजवळ ही घटना घडली. त्यांनी तात्काळ इस्लामपूरच्या शासकीय पशुसंवर्धन रुग्णालयातील डॉक्टरांना बोलावून घेतले. डॉ. प्रकाश कोळी १० ते १५ मिनिटांत घटनास्थळी दाखल झाले. याचवेळी ही माहिती शिराळा येथील वन विभागाला देण्यात आली. तोपर्यंत झाडावर जखमी अवस्थेत असलेल्या माकडाला अविष्कार पाटील, अभिलाष पाटील, ऋषिकेश पाटील, ओंकार मरळे यांनी झाडावरून खाली घेतले. पोट फाटल्याने या जखमी माकडाची अवस्था गंभीर बनली होती. तशाही परिस्थितीत माकडाचा जीव वाचविण्यासाठी ही मुले धडपडत होती.
सायंकाळी साडेसात वाजता वन विभागाचे कर्मचारी आले. त्यांनी, परिसरातील कुत्री बांधून ठेवा, असे फर्मान सोडले. तसेच या माकडाला आम्ही हात लावणार नाही, अशी भूमिका घेत मर्कटलीला दाखविल्या. शेवटी या चौघा मुलांनीच या माकडाला घेऊन इस्लामपूरचे रुग्णालय गाठले. तेथे रात्री उशिरा डॉ. अंबादास माडकर आणि डॉ. प्रकाश कोळी यांनी माकडावर शस्त्रक्रिया केली. त्यानंतर या जखमी माकडाला वन्यजीवांच्या अधिवासात सोडण्यासाठी वन विभागाचे कर्मचारी त्याला घेऊन गेले.