सांगली : गेल्या बारा वर्षांपासून पर्यावरण अहवालाबाबत महापालिका प्रशासनाने कधीच गांभीर्य दाखविले नाही; पण यंदा आयुक्त नितीन कापडणीस यांनी आरोग्य विभागाला पर्यावरण अहवाल तयार करण्याचे आदेश दिले. आता खासगी कंपनीकडून हा अहवाल तयार करण्याचे सुरू झाले असून, येत्या ६० दिवसांत हा अहवाल महापालिकेला सादर होणार आहे.
महापालिका क्षेत्राचा विकास साधताना पर्यावरणाचे संतुलन ठेवण्यासाठी काही उपाययोजना करणे आवश्यक असते. महापालिकेच्या पायाभूत सुविधा, पाणीपुरवठा, मलनिस्सारण, घनकचरा, प्राणी व वनसंपदा, विरंगुळ्याची साधने, हवा, पाणी व ध्वनी प्रदूषण आदींचा अभ्यास करून पर्यावरण अहवाल तयार केला जातो. त्यातून लोकजागृती हा एक उद्देश असतो. शिवाय शहरातील प्रदूषण कमी करण्यासाठी कोणत्या उपाययोजना कराव्यात, याचा ऊहापोह झाल्यास प्रदूषण करणाऱ्या बाबींवर नियंत्रण आणता येते. पण या साऱ्या गोष्टींना महापालिकेने फाटा दिला होता.
महापालिकेच्या स्थापनेनंतर केवळ २००८-०९ मध्ये पर्यावरण अहवाल तयार करण्यात आला होता. त्यानंतर आजअखेर त्याला मुहूर्त सापडला नव्हता. आयुक्त नितीन कापडणीस यांनी पर्यावरण अहवालाबाबत सजगता दाखविली. आता अहवाल तयार करण्यासाठी भिवंडी येथील स्कायलॅब ऍनाल्याटिकल लॅबाेरोटरी या संस्थेची नियुक्ती करण्यात आली आहे. या संस्थेचे चार प्रतिनिधींकडून अहवाल तयार करण्याचे काम सुरू झाले आहे. हा पर्यावरण अहवाल ६० दिवसांत तयार केला जाणार आहे. पर्यावरणात होणारे बदलांची माहिती होण्यासाठी एक यंत्र आरोग्य मुख्यालय येथे लावण्यात आले आहे. तब्बल एक तपानंतर महापालिकेला पर्यावरण अहवालासाठी मुहूर्त सापडला आहे.