इस्लामपूूर : शहरातील वर्चस्ववादाच्या कारणातून जूनमध्ये एकाचा खून करणाऱ्या आज्या मेहरबान टोळीतील सात जणांवरील मोक्का कारवाईला राज्याचे अप्पर पोलीस महासंचालक डॉ. राजेंद्र सिंग यांनी अंतिम मंजुरी दिली आहे. या टोळीविरुद्ध येथील मोक्का न्यायालयात २१०० पानांचे आरोपपत्र दाखल करण्यात आले आहे.
या टोळीचा प्रमुख अजित हणमंत पाटील (वय २८, रा. पाटील भजनी मंडळाजवळ), सूरज ऊर्फ पांड्या अशोक जाधव (२६, रा. तानाजी चौक), प्रतीक ऊर्फ पिल्या सुरेश पाटील (१९, रा. तिरंगा चौक), कप्या ऊर्फ कपिल कृष्णा पवार (२६, तानाजी चौक), सचिन ऊर्फ रघू बाबूराव कोळेकर (३३, रा. निनाईनगर) आणि संतोष भीमराव कोळेकर (३२, रा. धनगर गल्ली) या गुंडांविरुद्ध पोलीस निरीक्षक नारायण देशमुख यांनी मोक्का कारवाईचा प्रस्ताव पाठविला होता. खून आणि मोक्का अशा दोन्ही कारवाईचा तपास पोलीस उपअधीक्षक कृष्णात पिंगळे यांनी केला आहे. या कारवाईत एका अल्पवयीन मुलाचाही समावेश आहे. जून महिन्यात आज्या पाटील गॅँगने संतोष रखमाजी कदम याचा चाकूने भोसकून खून केला होता. कदम आपल्या गॅँगसोबत काम करीत नाही, यावरून त्याची बाचाबाची झाली होती. या बाचाबाचीतून मध्यरात्रीच्या साडेबाराच्य सुमारास संतोष कदम याच्या घरासमोर जाऊन वरील टोळक्याने त्याचा खून केला होता. या घटनेनंतर वरील सर्व संशयितांविरुद्ध खुनाचा गुन्हा दाखल झाला.
या टोळीने इस्लामपूर शहरासह इतर ठिकाणी खून, खुनाचा प्रयत्न, खंडणी, जमिनी-प्लॉट बळकाविणे व सावकारीसह अनेक गुन्हे करत दहशत माजविली होती. त्यांच्या या दहशतीला पायबंद घालण्यासाठी या टोळीविरुद्ध मोक्का कारवाईचा अवलंब केला. पोलीस प्रमुख दीक्षित गेडाम, अप्पर पोलीसप्रमुख मनीषा दुबुले यांच्या मार्गदर्शनाखाली पिंगळे यांनी तपास केला. पोलीस नाईक संदीप सावंत यांनी तपासात सहकार्य केले.
चौकट
सहा मोक्का... ३७ जण आत
पोलीस उपअधीक्षक कृष्णात पिंगळे म्हणाले, इस्लामपूर उपविभागात आतापर्यंत सहा टोळ्यांना मोक्का कारवाईचा दणका दिला आहे. या सहा टोळ्यांतील ३७ गुंड गेल्या दीड-पावणे दोन वर्षापासून कारागृहात खितपत पडले आहेत. आतापर्यंत इस्लामपुरातील सोन्या शिंदे, अनमोल मदने, पारधी गॅँग, कप्या पवार, अज्या मेहरबान या टोळ्यांसह आष्ट्यातील उदय मोरे गॅँगवर कारवाई झाली आहे. शहरातील आणखी काही टोळ्या या कारवाईच्या रडारवर आहेत. या टोळ्यातील गुन्हेगारांनी एक चूक जरी केली तर त्यांच्यावर मोक्का कारवाई अटळ आहे.
फोटो -२५१२२०२०-आयएसएलएम-आज्या मेहरबान गॅँग (एका पट्टीत सहा सिंगल फोटो आहेत.)