महापालिकेच्या सभेत काही नगरसेवकांनी आदिसागरमधील साहित्य गेले कुठे, असा सवाल उपस्थित केला होता. त्यावर आयुक्त कापडणीस यांनी पत्रकार बैठकीत खुलासा केला. ते म्हणाले की, गतवर्षी आदिसागर कोविड सेंटरसाठी खरेदी केलेले सर्व साहित्य सुरक्षित आहे. ३५ हायफ्लो नोझल ऑक्सिजन मशीन व पाच व्हेंटिलेटर खासगी रुग्णालयांना भाड्याने दिले आहेत. त्याचे दररोजचे २० हजार भाडे महापालिकेला मिळत आहे. ऑक्सिजन टँक, बेड, एक्सरे मशीन, लॅबच्या साहित्यातून तंत्रनिकेतनमधील कोविड सेंटर सुरू करीत आहोत. यामुळे मिरजेच्या सेंटरवर एक रुपयाही नव्याने खर्च करण्याची गरज भासली नाही. केवळ ऑक्सिजन लाईन नव्याने टाकण्याची गरज होती. हा खर्चही सीएसआरमधून होणार आहे. हे कोविड सेंटर महालॅबशी जोडण्यात आले आहे.
महापालिकेने क्वारंटाईनपासून होम आयसोलेशनपर्यंतची व्यवस्था उभी केली आहे. १६ आरोग्य केंद्रांवर लसीकरण सुरू आहे. १ मे पासून १८ वर्षांवरील लसीकरणाला सुरुवात होईल. त्यासाठी आणखी १४ केंद्रे वाढविली जाणार आहेत. प्रत्येक वाॅर्डात एक लसीकरण केंद्र उभारण्यात येईल. सध्या लसीकरण व कोरोना चाचणी एकाच ठिकाणी सुरू असून, चाचणी स्वतंत्र इमारतीत सुरू केली जाणार आहे. महापालिकेने १३ रुग्णवाहिकांची व्यवस्था केली आहे. पाच शववाहिकाही आहेत. महापालिका क्षेत्रात २५ कोविड सेंटर सुरू आहेत. त्यात १४४७ बेड असून, ऑक्सिजनचे ३४०, व्हेंटिलेटरचे १४७, हायफ्लो नोझलचे ९६ बेड आहेत. रुग्णालयांनी तुटवडा लक्षात घेऊन नियोजन केल्याने अजून तरी कोणत्या रुग्णांना ऑक्सिजन मिळत नसल्याचा प्रकार समोर आलेला नाही, असेही ते म्हणाले.
चौकट
ऑक्सिजन प्लांटसाठी निविदा
महापालिकेच्या वतीने ऑक्सिजन प्लांट उभारला जाणार आहे. महिन्याभरात हा प्लांट उभा राहू शकतो. १२५ जम्बो सिलिंडरची क्षमता असलेला हा प्लांट असेल. त्यासाठी कमी कालावधीची निविदा काढली आहे. सध्या मिरज कोविड सेंटरमध्ये तो उभा केला जाईल. कोरोनाचे संकट संपल्यानंतर तो कुपवाडमधील दोन रुग्णालयांसाठी वापरात आणता येणार असल्याचेही कापडणीस यांनी सांगितले.