लाेकमत न्यूज नेटवर्क
मिरज : मिरज शासकीय कोविड रुग्णालयात रुग्णसंख्या कमी होत असली तरी अत्यवस्थ रुग्णांची संख्या जास्त असल्याने अद्यापही दररोज आठ हजार लिटर ऑक्सिजनचा वापर सुरू आहे. गेल्या चार महिन्यांत रुग्णालयात ऑक्सिजनची गरज केवळ दोन हजार लिटरने कमी झाली आहे. मिरज सिव्हिलला दररोज कोल्हापूर व पुण्यातून ऑक्सिजन पुरवठा सुरू आहे.
कोविड साथीमुळे मार्चपासून मिरज शासकीय रुग्णालयात कोविड सेंटर सुरू झाल्याने गरीब रुग्णांची सोय झाली आहे. मिरज कोविड रुग्णालय एप्रिल ते जुलैपर्यंत भरले होते. येथे सुमारे ३५० रुग्णांसाठी ऑक्सिजन बेडची सोय आहे. रुग्णालयातील अतिदक्षता विभागात शंभर व्हेंटिलेटर बेडना अखंड ऑक्सिजन पुरवठा आवश्यक आहे. कोविड रुग्णालय सुरू झाल्यानंतर प्रत्येकी सहा हजार किलो लीटर क्षमतेच्या तीन ऑक्सिजन टाक्या येथे बसविण्यात आल्या. एप्रिलपासून सुरू झालेल्या कोविडच्या दुसऱ्या लाटेत रुग्ण संख्या झपाट्याने वाढल्याने दररोज दहा हजार लिटर ऑक्सिजनचा वापर सुरू होता. जूनपासून रुग्णसंख्या कमी झाल्याने दररोज आठ हजार लीटर ऑक्सिजनचा वापर सुरू आहे. रुग्णसंख्या कमी झाली तरी अतिदक्षता विभागात व्हेंटिलेटरवर असलेल्या अत्यवस्थ रुग्णांसाठी आवश्यकता असल्याने ऑक्सिजनचा वापर केवळ दोन हजार लीटरने कमी झाला आहे..
जिल्ह्याचे कोविड सेंटर असल्याने येथे व्हेंटिलेटरवर असलेल्या गंभीर रुग्णांना कृत्रिम श्वासोच्छ्वासासाठी द्रवरुप ऑक्सिजनचा दुप्पट वापर होतो. ऑक्सिजनची मागणी कायम असल्याने दररोज टँकरने पुरवठा सुरूच आहे. जिल्ह्यातील अनेक कोविड सेंटर बंद झाली आहेत. मात्र, मिरज सिव्हिलमध्ये ऑक्सिजनची गरज कायम असल्याचे चित्र आहे. एप्रिल व मे महिन्यात तुटवडा असल्याने ऑक्सिजन पुरवठा अनियमित होता. आता अन्यत्र मागणी कमी असल्याने पुरवठा सुरळीत आहे.
चाैकट
हवेपासून ऑक्सिजन निर्मिती प्लांटची उभारणी
मिरज सिव्हिलच्या आवारात हवेपासून ऑक्सिजन निर्मिती करणाऱ्या प्लांटची उभारणी व चाचणी पूर्ण झाली आहे. ऑक्सिजन प्लांटपासून रुग्णालयापर्यंत पाईप जोडणीचे काम पूर्ण झाल्यानंतर हा प्लांट कार्यरत होणार आहे. या प्लांटमधून सिव्हिलला दररोज १२५ जम्बो सिलिंडर ऑक्सिजन पुरवठा होणार असल्याचे सांगण्यात आले.