शिराळा : शिराळा नगरपंचायतीच्या नगराध्यक्ष व उपनगराध्यक्ष पदांसाठीची निवडणूक शुक्रवार दि. ११ डिसेंबर रोजी होत असून नगराध्यक्ष पदासाठी राष्ट्रवादी काँग्रेसच्या बांधकाम सभापती सुनीता निकम, प्रतिभा पवार यांच्यापैकी कोणाची तरी वर्णी लागण्याची शक्यता आहे.
नगराध्यक्ष पदासाठी दि. ७ डिसेंबरला सकाळी १० ते २ या वेळेत उमेदवारी अर्ज दाखल करण्याची मुदत आहे. छाननी त्याचदिवशी दुपारी २ नंतर हाेईल. अर्ज माघारीची मुदत दि. ११ डिसेंबर रोजी दुपारी १२ पर्यंत असेल. यानंतर आवश्यक असल्यास दुपारी १२ नंतर लगेच निवडणूक होणार आहे.
उपनगराध्यक्ष पदासाठी दि. ११ डिसेंबर रोजी सकाळी १० ते १२ पर्यंत उमेदवारी अर्ज दाखल करण्याची मुदत आहे. यानंतर लगेचच छाननी, उमेदवारी अर्ज माघार व आवश्यकता भासल्यास नगराध्यक्ष पदाची निवडणूक झाल्यानंतर लगेचच उपनगराध्यक्ष पदाचीही निवडणूक होणार आहे.
२५ नोव्हेंबर रोजी उपनगराध्यक्ष कीर्तीकुमार पाटील यांनी, तर १ डिसेंबर रोजी नगराध्यक्षा अर्चना शेटे यांनी, पक्षाने दिलेला कार्यकाल संपल्याने राजीनामा दिला आहे. नगराध्यक्षपद महिला राखीव आहे. त्यामुळे दोन इच्छुक उमेदवार आहेत. यामध्ये सुनीता निकम व प्रतिभा पवार यांना प्रत्येकी दहा महिने कार्यकाळ देण्याचे याअगोदरच ठरले आहे. त्यामुळे बांधकाम व शिक्षण सभापती सुनीता निकम, प्रतिभा पवार यापैकी कोणाची वर्णी लागणार, याची चर्चा आहे. तसेच उपनगराध्यक्ष पदासाठी विजय दळवी, गौतम पोटे, संजय हिरवडेकर यांच्यापैकी कोणाची वर्णी लागणार याबाबतही उत्सुकता आहे.