लोकमत न्यूज नेटवर्क
सांगली : केंद्र सरकारच्या पेट्रोल, डिझेल, घरगुती गॅसच्या दरात भरमसाट वाढ केल्याने जीवनावश्यक वस्तूंचे दर गगनाला भिडले आहेत. याविरोधात विश्रामबाग चौकात मदनभाऊ युवा मंचाच्या वतीने साखरवाटप करून केंद्र सरकारचा अनोखा निषेध करण्यात आला.
युवा मंचाचे अध्यक्ष आनंद लेंगरे यांच्या नेतृत्वाखाली हे आंदोलन करण्यात आले. लेंगरे म्हणाले की, आंतरराष्ट्रीय बाजारात कच्च्या तेलाच्या किमती कमी झाल्या असूनही आपल्या देशात भाजप सरकारच्या राज्यात तेलाच्या किमतीही कमी होताना दिसून येत नाहीत. यामागचे गौडबंगाल काय? दैनंदिन वापरातील घरगुती गॅस काँग्रेस सरकारच्या काळात ४१० रुपये झाल्यावर भाजप पक्ष रस्त्यावर उतरून रास्ता रोको आंदोलन करत होता. आता त्यांच्या सत्ताकाळात घरगुती गॅस ८०० रुपयांवर गेल्यानंतरही त्यांची तोंडे गप्प आहेत. भाजप सरकारने महागाई कमी करावी, अन्यथा सर्वसामान्य जनता रस्त्यावर उतरल्याशिवाय राहणार नाही. केंद्र सरकारच्या महागाईच्या विरोधात मदनभाऊ पाटील युवा मंचाच्या वतीने उपरोधात्मक असे साखरवाटप आंदोलन केल्याचे सांगितले.
या वेळी दिनेश सादिगले, अजय पवार, सुजीत लकडे, सचिन माने, शंकर माने, अक्षय दोडमनी, महेश पाटील, शीतल लोंढे, शेखर पाटील, महेश कोळी, सागर पवार, प्रवीण निकम, महेश कर्णे, अमोल झांबरे, मयूर बांगर, तोफिक कोतवाल आदी पदाधिकारी व कार्यकर्ते मोठ्या संख्येने उपस्थित होते.