शिरटे : रेठरे बुद्रुक (ता. कऱ्हाड) येथील यशवंतराव मोहिते कृष्णा सहकारी साखर कारखान्याने उत्पादित केलेल्या इथेनॉलचा पुरवठा ऑईल कंपन्यांना करण्यास सुरुवात झाली आहे. बी हेवी मोलॅसिसपासून या इथेनॉल निर्मिती करण्यात आली. पहिल्या इथेनॉल टँकरचे पूजन अध्यक्ष डॉ. सुरेश भोसले यांच्या हस्ते करून टँकर ऑईल कंपन्यांकडे रवाना केले. यंदा कारखान्याने एक कोटी लिटर इथेनॉलची निर्मिती करण्याचे उद्दिष्ट निश्चित केले आहे.
केंद्र सरकारने इथेनॉलबाबत घेतलेले सकारात्मक धोरण, इथेनॉलला मिळणारा योग्य दर लक्षात घेऊन, कृष्णा सहकारी साखर कारखान्याने बी हेवी मोलॅसिसपासून इथेनॉल निर्मिती सुरू केली. गेल्या वर्षी २०२० मध्ये कारखान्याने बी हेवी मोलॅसिसपासून ५० लाख लिटर इथेनॉल उत्पादन व विक्री केली.
यावेळी संचालक पांडुरंग होनमाने, सुजित मोरे, मनोज पाटील, कार्यकारी संचालक सूर्यकांत दळवी, जनरल मॅनेजर (टेक्निकल) प्रसाद राक्षे, असिस्टंट जनरल मॅनेजर (डिस्टिलरी) प्रतापसिंह नलवडे, चंद्रकांत मिसाळ, गिरीश इस्लामपूरकर, पंकज पाटील, डी. व्ही. कुंभार, अरुण पाटील, सुयोग खानविलकर, डॉ. हर्षल निकम, आदी उपस्थित होते.
चौकट
इथेनॉल प्रकल्पाची गरुडभरारी
डॉ. सुरेश भोसले यांनी २००३ मध्ये २० हजार लिटर प्रतिदिन क्षमतेचा इथेनॉल प्रकल्प उभारला होता. २०१६ ला प्रकल्पाचे आधुनिकीकरण करून ६० हजार लिटर प्रतिदिन क्षमतेच्या एम. एस. डी. एच. या आधुनिक तंत्रज्ञानावर आधारित इथेनॉल प्रकल्पाची उभारणी केली. २०२० मध्ये या प्रकल्पाची उत्पादन क्षमता ६० हजारांवरून ७८ हजार लिटर प्रतिदिन एवढी करण्यात आली आहे.
फोटो - १३०१२०२१-आयएसएलएम- कृष्णा कारखाना न्यूज
ओळ : रेठरे बुद्रुक (ता. कऱ्हाड) येथील कृष्णा कारखान्याच्या कार्यस्थळावर इथेनॉलच्या पहिल्या टँकरचे पूजन डॉ. सुरेश भोसले यांच्या हस्ते करण्यात आले. यावेळी संचालक पांडुरंग होनमाने, सुजित मोरे, सूर्यकांत दळवी, मनोज पाटील उपस्थित होते.