सांगली : कोरोनाचे वातावरण नियंत्रणात येत असल्याने यंदाच्या गणेशोत्सवात उत्साह कायम आहे. याच कालावधीत कायदा सुव्यवस्था अबाधित राखण्यासह नागरिकांच्या सोयीसाठी शहरात ठिकठिकाणी पोलीस कार्यरत आहेत. विसर्जनावेळी अशाच कार्यरत कर्मचाऱ्याने खाकीचा रुबाब बाजूला सारत सर्वसामान्य नागरिकांना मदतीचा हात दिला. आणि कर्मचाऱ्याचे काम पाहून अधीक्षक दीक्षित गेडाम यांनीही त्याच्या पाठीवर कौतुकाची धाप दिली.
गणेश विसर्जनामुळे शहरातील प्रमुख मार्गावर आणि विशेषत: नदीकाठावर मोठी गर्दी असते. अशावेळी वाहतूक नियोजनासह गर्दी होणार नाही यासाठी यंदा सर्वच ‘स्पॉट’वर विशेष पोलीस बंदोबस्त तैनात करण्यात आला आहे. वाहतूक शाखेचे कर्मचारीही त्याठिकाणी कार्यरत असतात. गुरुवारी विसर्जनाच्या सातव्या दिवशी सरकारी घाट परिसरात वाहतूक पोलीस निखिल जाधव कर्तव्यावर होते. नेमके याचवेळी एक कुटुंब दुचाकीवरून गणेशमूर्ती घेऊन विसर्जनासाठी आले. दुचाकीवर महिलेच्या हातात मूर्ती तर पुढे लहान बाळ...त्यामुळे त्या कुटुंबाची अडचण झाली. दुचाकीवरून उतरायचे तर मूर्ती सावरायला कोणीतरी हवे. आणि एकूणच गर्दीमुळे त्यांच्याकडे कोणाचे लक्षही जात नव्हते. मूर्ती हातातच असल्याने ती खाली ठेवून उतरणे धोक्याचे होते. नेमकी हीच अडचण ओळखून जाधव यांनी त्या कुटुंबाजवळ जात ती मूर्ती घेत त्यांना वाहन बाजूला लावण्यात मदत केली. शिवाय त्या कुटुंबाला सहकार्यही केले. वाहतूक पोलिसाच्या या मदतीमुळे भारावलेल्या कुटुंबाने त्यांचे विशेष आभार मानले. नियमित वाहतूक नियोजनाच्या कामाव्यतिरिक्त जाधव यांनी दाखवलेल्या कार्यतत्परतेची अधीक्षक गेडाम यांनीही दखल घेत निखिल जाधव यांचा पुष्पगुच्छ देत गौरव केला व खाकीच्या पलीकडे जाऊन केलेल्या कामाचे कौतुक केले. या वेळी वाहतूक शाखेच्या सहायक निरीक्षक प्रज्ञा देशमुख उपस्थित होत्या.