लोकमत न्यूज नेटवर्क
कवठे एकंद : तासगाव तालुक्यातील सधन व प्रगतशील गाव म्हणून कवठे एकंद येथे क्रीडा क्षेत्राबाबत उदासीनता आहे. गावातील युवापिढीला खेळण्यासाठी मैदानाची उपलब्धता नाही. सार्वजनिक क्रीडांगणाची गरज ओळखून गावातील युवकांनी आरफळच्या दुर्लक्षित जागेची स्वच्छता व डागडुजी करून मैदान करण्यासाठी प्रयत्न केले जात आहेत.
आरोग्यासाठी व्यायाम गरजेचा आहे.
शैक्षणिक क्रीडा स्पर्धा व स्पर्धा परीक्षा, पोलीस भरती, सैन्यभरती यासाठी युवकांना
मैदान उपलब्ध नाही, ही बाब लक्षात घेऊन
येथील स्वराज्य कला, क्रीडा व सांस्कृतिक मित्र मंडळाच्या पुढाकाराने गेली आठ ते दहा वर्षांपासून आरफळ मैदान येथील परिसरातील काटेरी झाडे, गवत काढून युवकांनी श्रमदानातून स्वच्छता व जमिनीचे सपाटीकरण केले. यामुळे क्रीडांगण साकारले जात आहे.
सातत्याने स्वच्छता आणि परिसराची सफाई केल्याने क्रीडांगणाची सोय होत आहे; मात्र गेल्या काही दिवसांपासून तासगाव-सांगली रस्त्याला असणाऱ्या सार्वजनिक मैदानावर मध्यपींच्या उद्योगामुळे काचेच्या बाटल्या, प्लास्टिक, काचेचे तुकडे यामुळे परिसराला किळसवाणे करून टाकले आहे.
याची दखल घेत लॉकडाऊनच्या काळात युवकांनी परिसराची स्वच्छता व काटेरी झुडपांचे उच्चाटन करण्याचे काम हाती घेत मद्यपी विरोधात मोहीम हाती घेतली आहे.
या कामासाठी चेतन लंगडे, सचिन जाधव, बंडू गोरे, सुधीर शिरोटे ,
प्रकाश माळी,विनोद लिमकर ,जनार्दन पाटील, विद्यासागर लंगडे,भरत कोगनोळे, नीलेश पाटील आदींसह युवकांचे सहकार्य लाभत आहे.
कोट
गावातील आबालवृद्धांचा सकाळ-संध्याकाळ फिरण्यासाठी तसेच पोलीस व सैन्य भरतीचा प्रयत्न करणाऱ्या युवकांना व्यायामासाठी हक्काचा ट्रॅक बनला आहे. क्रीडांगणाच्या संरक्षणासाठी,
स्वच्छतेसाठी नागरिकांनी सहकार्य करावे.
- चेतन लंगडे अध्यक्ष स्वराज्य कला-क्रीडा मित्र मंडळ.