जत : जत तालुक्यातील दूध उत्पादक शेतकऱ्यांना न्याय्य व योग्य दर मिळवून देण्यासाठी जत तालुका दूध संघाची स्थापना केली आहे. त्याला शासनाकडून नोंदणी प्रमाणपत्रही मिळाले आहे. येत्या २१ फेब्रुवारीला तिप्पेहळ्ळी (ता. जत) येथे दूध संकलन केंद्र व चीलिंग सेंटर सुरू करण्यात येणार आहे, अशी माहिती आमदार विक्रम सावंत यांनी पत्रकार बैठकीत दिली.
सावंत म्हणाले. सन १९८५ पासून जत तालुका दूध संघ स्थापन करण्यासाठी प्रयत्न सुरू होते, परंतु त्याला गती आली नव्हती. तालुका भौगोलिक विस्ताराने मोठा असूनही तालुक्यातील दूध उत्पादक शेतकऱ्यांना योग्य दर व न्याय मिळत नव्हता. त्यामुळे आम्ही जत तालुका दूध संघ स्थापन करण्याचा प्रस्ताव शासनाकडे सादर करून त्याला मान्यता मिळवून घेतली आहे. या दूध संघात २१ जणांचे संचालक मंडळ असून तालुक्याच्या विविध भागातील दूध उत्पादक शेतकऱ्यांचा त्यामध्ये समावेश करण्यात आला आहे. या दूध संघाच्या माध्यमातून दूध उत्पादक शेतकऱ्यांना सवलती व शासकीय योजनेचा फायदा मिळवून देऊन जास्तीत जास्त दर देण्याचा प्रयत्न आहे. २१ फेब्रुवारील प्राथमिक स्वरूपात दूध संकलन सुरू करण्यात येणार आहे. दररोज सरासरी दहा हजार लिटर दूध संकलन होईल.
दूध संघाच्या माध्यमातून तालुक्यातील सुमारे ५० तरुण बेरोजगार युवकांना रोजगार मिळवून देण्याचा प्रयत्न आहे. तालुक्यातील प्रत्येक गावातील सहकारी संस्था व दूध संकलन केंद्र यांच्याशी संलग्न राहून तेथील दूध तालुका दूध संघाकडून संकलित करण्याचा प्रयत्न आहे. दूध संघाचे कार्यक्षेत्र जत तालुका मर्यादित स्वरूपात राहणार असून येथे संकलित झालेले दूध (पुणे) किंवा जर्सी डेअरी (हैदराबाद) येथे पुरविण्याबाबत प्राथमिक चर्चा सुरू आहे. तालुका दूध संघ संचालक मंडळाच्या बैठकीत यासंदर्भात चर्चा करून अंतिम निर्णय घेतला जाईल.
यावेळी तालुका काँग्रेस कमिटीचे अध्यक्ष आप्पाराया बिराजदार, दूध संघाचे उपाध्यक्ष महादेव दुधाळ-पाटील, सचिव ॲड. युवराज निकम, संचालक अतुल मोरे, गणेश गिड्डे उपस्थित होते.