लोकमत न्यूज नेटवर्क
जत : दानम्मादेवी जत तालुका शेतकरी दूध संघ दुष्काळी भागातील दूध उत्पादक शेतकरी व दूध सोसायट्यांना वरदान ठरणारा आहे. गटा-तटाचे राजकारण व मतभेद बाजूला ठेवून भविष्यात या दूध संघाची वाटचाल होईल, असा आत्मविश्वास आमदार विक्रम सावंत यांनी व्यक्त केला. दूध संघाच्या उद्घाटनप्रसंगी आयोजित कार्यक्रमात ते बोलत होते.
नव्यानेच सुरू होत असलेला दूध संघ कोणाच्याही खासगी मालकीचा नाही. तालुक्यातील दूध उत्पादक शेतकऱ्यांवर होत असलेल्या अन्यायाला वाचा फोडण्यासाठी सहकारी तत्त्वावर संघ स्थापन करण्यात आला आहे. दूध उत्पादक शेतकऱ्यांच्या दुधाला शासन दरानुसार हमीभाव मिळत नसल्याची तक्रार होती. तालुका पातळीवरील दूध संघ नसल्याने शेतकऱ्यांना गैरसोयींचा सामना करावा लागत होता. यापुढील कालावधित कोणत्याही गैरसोयीचा सामना दूध उत्पादक शेतकरी व संस्थांना सहन करावा लागणार नाही, अशी ग्वाही आमदार विक्रम सावंत यांनी दिली.
तालुका काँग्रेस कमिटीचे अध्यक्ष आप्पाराया बिराजदार यांनी स्वागत व प्रास्ताविक केले. जिल्हा दुग्ध व्यवसाय अधिकारी अरुण चौगुले, वरिष्ठ लेखाधिकारी उच्च शिक्षण कोल्हापूर रणजित झपाटे, सहायक निबंधक सहकारी संस्था बाळासाहेब पाटील, पशुवैद्यकीय अधिकारी डॉ. व्ही. बी. जवणे यांनी मनोगत व्यक्त केले.
यावेळी जि. प. सदस्य महादेव पाटील, मल्लेश कत्ती, सुजय शिंदे, ॲड. युवराज निकम, गणेश गिड्डे, अतुल मोरे, नाथा पाटील, रवींद्र शिंदे, काका शिंदे आदी उपस्थित होते. बाबासाहेब कोडग यांनी आभार मानले.