संजयनगर : सांगली मिरज कुपवाड महानगरपालिकेत केंद्रीयमंत्री रामदास आठवले यांच्या रिपब्लिकन पार्टी ऑफ इंडियाची भाजपसोबत युती आहे. गत निवडणुकीत रिपाइंचे जगन्नाथ ठोकळे हे भाजपच्या चिन्हावर निवडून आले. आगामी उपमहापाैर निवडीवेळी नगरसेवक जगन्नाथ ठोकळे यांना संधी मिळावी, अशी मागणी रिपब्लिकन पक्षातर्फे करण्यात आली आहे. याबाबत नगरसेवक विवेक कांबळे, सांगली जिल्हा अध्यक्ष संजय कांबळे व महिला आघाडी सांगली जिल्हा अध्यक्ष छाया सर्वेदे यांनी भाजपचे प्रदेशाध्यक्ष चंद्रकांत पाटील यांना निवेदन दिले आहेत.
नगरसेवक जगन्नाथ ठोकळे यांनी प्रधानमंत्री आवास योजनेतून गोरगरिबांना न्याय देण्याचा प्रयत्न केला आहे. प्रभागांमध्ये कोट्यवधींचे निधी आणून विविध विकासकामे सुरू केले आहे. काम करणाऱ्या व्यक्तीला मनपामध्ये पदे मिळणे अपेक्षित आहे. रिपब्लिकन पक्षाला गेल्या अडीच वर्षांमध्ये महानगरपालिकेत कोणतेही मानाचे स्थान मिळाले नाही. यावेळी उपमहापौर पद दिले तर जिल्ह्यामध्ये परिवर्तनाचे वादळ निर्माण होणार आहे. जगन्नाथ ठोकळे यांना संधी देऊन भारतीय जनता पक्षच आंबेडकरी चळवळीतील कार्यकर्त्यांना न्याय देऊ शकतो हे पुन्हा एकदा सिद्ध होईल, असे निवेदनात म्हटले आहे.
फोटो-१४दुपटे४
फोटो ओळी : नगरसेवक जगन्नाथ ठोकळे यांना उपमहापौरांची संधी द्यावी या मागणीसाठी भाजप प्रदेशाध्यक्ष चंद्रकांत पाटील यांना आरपीआयच्या वतीने निवेदन देण्यात आले. यावेळी विवेक कांबळे, संजय कांबळे, जगन्नाथ ठोकळे, शेखर इनामदार उपस्थित होते.