इस्लामपूर : इस्लामपूर-पेठ रस्त्यावरील शासकीय विश्रामगृहासमोरील रस्त्यावर चहाच्या टपरीवर थांबलेल्या ठेकेदारास चाकूचा धाक दाखवत जिवे मारण्याची धमकी देत दोघा लुटारूंनी त्याच्या खिशातील १७ हजार रुपयांची रोकड लुटली. यातील एका लुटारूस नागरिकांच्या मदतीने पकडून पोलिसांच्या हवाली करण्यात आले. गुरुवारी दुपारी तीनच्यासुमारास ही घटना घडली.
याबाबत युनूस जमिरअहमद खान (वय ३२, मूळ रा. उरौलीया, जि. बदायु-उत्तरप्रदेश, सध्या-श्रीपादनगर,
इस्लामपूर) यांनी पोलिसात फिर्याद दिली आहे. बबन भगवान वाघमोडे असे पोलिसांनी ताब्यात घेतलेल्या संशयिताचे नाव आहे. त्याचा दुसरा साथीदार पळून गेला आहे. खान हा मजूर पुरवण्याचे ठेके घेतो. गेल्या आठ वर्षांपासून तो शहरात कुटुंबासह रहात आहे. आज दुपारी तो इस्लामपूरच्या औद्योगिक वसाहतीमधील काम आटोपून दुचाकीवरून नेर्लेकडे जात होता. यावेळी त्याच्यासोबत छुटन अच्छन खान आणि बाबू खान हे मजूर होते. पेठ रस्त्यावर शासकीय विश्रामगृह परिसरात आल्यावर चहा पिण्यासाठी थांबले. तेथे बाजूच्या गॅरेजमध्ये बसलेल्या दोघांनी युनूस खान याला सिगारेट मागितली. त्याने दोघांना सिगारेट दिली. याचवेळी बबन वाघमोडे याने त्याच्या गळ्याला चाकू लावून तुझ्याकडील असणारे पैसे दे, नाही तर तुला जिवंत ठेवणार नाही, असे म्हणून त्याच्याशी झटापट करत खिशातील १७ हजारांची रोकड जबरदस्तीने काढून घेत साथीदाराकडे दिली. यावेळी खान याने आरडाओरडा केल्यावर लोक जमले. त्यांनी बबन याला पकडून ठेवले, तोपर्यंत पैसे घेऊन त्याचा साथीदार पसार झाला. पोलीस उपनिरीक्षक डी. पी. शेडगे अधिक तपास करत आहेत.