राजकारणावर पकड व समाजकारणाची जाण असणारे एक संयमी, अनुभवी व प्रसन्न व्यक्तिमत्त्व डॉ. पतंगराव कदम साहेब यांचा वारसा समर्थपणे चालविणारे युवा नेतृत्व विश्वजीत ऊर्फ बाळासाहेब कदम यांना लहानपणापासूनच समाजकारणाबरोबर राजकारणाचे बाळकडू मिळाले.
पतंगराव कदम साहेब यांच्या निधनानंतर विश्वजीत ऊर्फ बाळासाहेब कदम यांच्यावर जनतेने विश्वास ठेवून विक्रमी मताधिक्याने विधानसभेवर पाठविले. पतंगराव कदम साहेबांची पुण्याई, जनतेचा विश्वास, परिवारातील सर्व सदस्यांची लाभलेली साथ व काॅंग्रेसच्या वरिष्ठ नेत्यांशी असलेले जिव्हाळ्याचे नाते जपत आज बाळासाहेब राज्याच्या मंत्रिपदी विराजमान झाले आहेत.
भारती विद्यापीठाचा कार्यवाहक व महाराष्ट्र राज्याचे युवक प्रदेशाध्यक्ष पदावर काम करत असताना मिळालेले अनुभव पाहता बाळासाहेबांना मिळालेल्या मंत्रिपदाच्या संधीचे सोने करून जनतेचा विश्वास सार्थ ठरवून वडिलांच्या कार्यास साजेसे असे काम करणारे नेतृत्व महाराष्ट्र राज्याला लाभले आहे.
केवळ शैक्षणिक संस्था आणि राजकारण यापुरतेच त्यांचे काम मर्यादित नाही, तर त्यांनी हाती घेतलेले ‘मुलगी वाचवा अभियान’ही यशस्वीरीत्या राबवून महिला सक्षमीकरणाला बळकटी देण्याचे कार्य केले. बाळासाहेबांनी सामाजिक कार्याबरोबर क्रीडा क्षेत्रातही चांगला ठसा उमटवला आहे.
महापूर असो की कोणतीही आपत्ती असो बाळासाहेब तेथे जातीने हजर असतात. आपल्या सर्व कार्यकर्त्यांची फौज मदतकार्यात सहभागी करून जनतेला आधार देत असतात. पुराच्या वेळी पूरग्रस्तांना राहण्याची, जेवणाची सोय दुधोंडी, रामानंदनगर, भिलवडी येथे केली. सर्वसामान्यांना मदतीचा हात देणारे नेतृत्व म्हणून बाळासाहेब यांच्याकडे पाहिले जाते.
पुण्यासारख्या राज्याच्या सांस्कृतिक राजधानीत वाढलेल्या बाळासाहेबांचे नेतृत्व राज्याच्या पटलावर सुसंस्कृत नेतृत्व म्हणून उदयास येत आहे. ज्या क्षेत्रात जायचे, त्याचा चांगला अभ्यास करायचा. त्यातील अडचणी समजून घ्यायच्या आणि सोडविण्यासाठी शक्य ते सर्व प्रयत्न करायचे, हा त्यांच्या स्वभावातील विशेष गुण आहे. अध्यक्षपदाच्या काळात त्यांनी युवकांच्या हिताचेच निर्णय घेतले. त्यामुळे ते युवकांच्या हृदयसिंहासनावर विराजमान झाले. अत्यंत मनमिळावूपणा, आस्थेवाईकपणे चौकशी करणे, अडीअडचणी मनापासून समजावून घेणे, गरजूंना मदत करणे ही बाळासाहेबांची वृत्ती सर्वसामान्यांना आधार वाटत असते. अशा या लोकप्रिय युवक ह्रदयसम्राट यांना वाढदिवसाच्या हार्दिक शुभेच्छा..
- शिवाजीराजे जाधव, दुधोंडी,
संस्थापक -शिवभवानी उद्योग समूह, दुधोंडी.