फोटो ओळ : कुपवाडमध्ये पोलिसांनी सुगंधी तंबाखू आणि गुटख्याच्या साठ्यावर कारवाई केली.
लोकमत न्यूज नेटवर्क
कुपवाड : मिरज औद्योगिक वसाहतीलगतची गुलमोहर काॅलनी, दुर्गानगर येथून कुपवाड एमआयडीसी पोलिसांनी एक लाख ८४ हजार ८० रुपयांचा गुटखा आणि पानमसाल्याचा साठा जप्त केला. या घटनेची कुपवाड एमआयडीसी पोलीस ठाण्यात नोंद झाली असून, पोलिसांनी गुटखा विक्री करण्यासाठी आलेल्या तरुणाला अटक केली आहे. अटक केलेल्या संशयिताचे नाव पांडुरंग देविदास सावंत (वय २८, रा.दुर्गानगर, कुपवाड) असे आहे.
पोलीस अधीक्षक दीक्षित गेडाम, अप्पर पोलीस अधीक्षक मनीषा डुबुले, मिरजेचे उपविभागीय पोलीस अधिकारी अशोक वीरकर यांनी कुपवाड पोलीस ठाण्याच्या हद्दीतील अवैध धंद्यांवर कारवाई करण्याचे आदेेेेश दिले होते. त्यानुसार पोलीस निरीक्षक नीरज उबाळे यांना मिरज एमआयडीसीजवळ एक तरुण सुगंधी तंबाखू व गुटखा विक्री करण्यासाठी येणार असल्याची माहिती मिळाली. त्यानंतर बुधवारी रात्री साहाय्यक निरीक्षक उबाळे यांच्या मार्गदर्शनाखाली पोलीस उपनिरीक्षक राजू अन्नछत्रे, तुषार काळेल, साहाय्यक पोलीस फौजदार युवराज पाटील, शिवानंद गव्हाणे, सतीश माने, इंद्रजित चेळकर, विजय घस्ते यांनी दुर्गानगर येथे सापळा रचला.
यावेळी दुर्गानगरजवळ एक तरुण प्लास्टिकच्या पिशव्यांतून काहीतरी घेऊन जात असल्याचे पोलिसांना दिसले. त्यावेळी पोलिसांनी विचारणा केल्यावर संशयित पांडुरंग सावंत मुद्देमाल रस्त्यावर टाकून पळून जाऊ लागला. पोलिसांनी त्याला पाठलाग करून पकडले. त्याला कुपवाड पोलीस ठाण्यात आणून त्याची चौकशी केली असता त्याने सुगंधी तंबाखू व गुटखा विक्री करण्यासाठी असल्याची कबुली दिली. कुपवाड पोलिसांनी त्याला अटक करून त्याच्याकडील मुद्देमाल जप्त केला आहे.