जत : विजापूर ते गुहागर राज्यमार्गावर रस्त्याकडेला उभ्या असलेल्या कारला पाठीमागून ट्रॅक्टरने धडक दिल्याने कारमध्ये बसलेले मकरंद ग्रामोपाध्याय, सचिन हंडीफोड, संभाजी बंडगर, अरुण कुलकर्णी (सर्व रा. मिरज) हे जखमी झाले. ही घटना बुधवारी रात्री दहा वाजण्याच्या दरम्यान धावडवाडी (ता. जत) गावाजवळ घडली. याप्रकरणी मकरंद ग्रामोपाध्याय यांनी ट्रॅक्टर चालकाविरोधात जत पोलिसात फिर्याद दाखल केली आहे.
अधिक माहिती अशी की, मकरंद ग्रामोपाध्याय हे धावडवाडीजवळ गाडीच्या शेजारी थांबले असताना ट्रॅक्टर (क्रमांक एमएच १०/ ७०५८) ने पाठीमागून जोरदार येऊन गाडीला धडक दिली. त्यामुळे कारमध्ये बसलेले वरील चार जण जखमी झाले. त्यांच्यावर खासगी रुग्णालयात उपचार सुरू आहेत. अपघात घडल्यानंतर ट्रॅक्टर चालकाने ट्रॅक्टर तेथेच सोडून पलायन केले. जत पोलीस त्याचा शोध घेत आहेत. या प्रकरणाचा पुढील तपास सुरू आहे.