विटा : विटा शहरातील नेहरूनगर परिसरात घरफोड्या करून किमती ऐवज लंपास करणाऱ्या चौघांना विटा पोलिसांनी शुक्रवारी अटक केली. कृष्णा ऊर्फ लाल्या नारायण भिसे (वय २०), साई ऊर्फ बालाजी सादू साठे (१९), अनिल बबन पाटोळे (२१) व आदित्य कैलास भिंगारदेवे (२१, सर्व रा. नेहरूनगर, विटा) अशी अटक केलेल्या संशयितांची नावे आहेत. त्यांच्याकडून पोलिसांनी २० हजारांचा मुद्देमाल जप्त केला आहे.
विटा येथील नेहरूनगर उपनगरात गेल्या दीड महिन्यात दोन ठिकाणी घरफोड्या झाल्या होत्या. याप्रकरणी पोलिसांत अज्ञातांविरुध्द गुन्हा दाखल होता. या घरफोडीतील संशयितांबद्दल पोलिसांना माहिती मिळाल्यानंतर नेहरूनगर येथेच राहणारे संशयित कृष्णा ऊर्फ लाल्या भिसे, साई ऊर्फ बालाजी साठे, अनिल पाटोळे व आदित्य भिंगारदेवे यांना ताब्यात घेतले.
त्यावेळी त्यांच्याकडे कसून चौकशी केली असता, त्यांनी नेहरूनगर भागात दोन घरफोड्या केल्याची कबुली दिली. त्यातील एका घरफोडीतील ३२ इंची एलसीडी व एक लहान पाण्याचा विद्युत पंप असा २० हजारांचा मुद्देमाल पोलिसांनी जप्त केला. पोलीस निरीक्षक संतोष डोके यांच्या मार्गदर्शनाखाली पोलीस नाईक आर. एन. महाडिक, एच. के. लोहार, राजू भिंगारदेवे, अमर सूर्यवंशी, सुरेश भोसले, शशिकांत माळी, चेतन सानप, सुजित देवराय यांनी ही कारवाई केली.