इस्लामपूर : बोरगाव-रेठरे हरणाक्ष गटात इस्लामपुरातील राष्ट्रवादीचे संजय पाटील यांनी सहकार पॅनेलमधून विजयश्री खेचून आणली, तर संस्थापक पॅनेलचे उमेदवार शिवाजी पवार यांनी पराभव मान्य केला. इतर राखीव गटातील ‘रयत’चे उमेदवार माजी नगराध्यक्ष आनंदराव मलगुंडे यांनीही कौल मान्य केला.
बोरगाव-रेठरे हरणाक्ष गटात इस्लामपूर येथील संजय पाटील यांनी सहकार पॅनेलमधून दुसऱ्यांदा निवडणूक लढवली आणि बाजी मारली. इतर राखीव गटामधून आनंदराव मलगुंडे यांनी ‘रयत’मधून लढत दिली. त्यांच्या विरोधातील सहकार पॅनेलच्या अविनाश खरात (खरातवाडी) यांनी विजयाचा गुलाल उधळला. याच गावातील संस्थापक पॅनेलचे नितीन खरात यांचाही पराभव झाला.
रयत आणि संस्थापक यांच्या मनोमिलनाचे गुऱ्हाळ वेळेत संपले नाही. त्यामुळे प्रचाराला वेळ कमी मिळाला. शिवाय विरोधी पॅनेलच्या धनशक्तीपुढे आमचा टिकाव लागला नसल्याची प्रतिक्रिया देत आनंदराव मलगुंडे यांनी कौल मान्य केला.
शहरात सहकार पॅनेलने आघाडी घेताच संजय पाटील यांच्या समर्थकांनी उरुण परिसरात फटाक्यांची आतषबाजी आणि गुलालाची उधळण करून मिरवणूक काढली. त्यानंतर आष्टा नाका येथे जाऊन राजारामबापू पुतळ्यास अभिवादन केले. या वेळी राष्ट्रवादीचे शहराध्यक्ष नगरसेवक शहाजीबापू पाटील, माजी नगराध्यक्ष भगवानराव पाटील, इस्लामपूर अर्बन बँकेचे अध्यक्ष संदीप पाटील, विजयभाऊ पतसंस्थेचे अध्यक्ष शिवराज पाटील आदी उपस्थित होते.