संख : दरीबडची (ता. जत) येथे शिवनिंग गुरबसू जामगोंड यांच्या शेतातील छपरास आग लागून दीड लाख रुपयांचे नुकसान झाले. आगीत दोन शेळ्या, रोख १८ हजार ५०० रुपये, मोटारसायकल, संसारोपयोगी साहित्य, कपडे, धान्य जळून खाक झाले. ही घटना गुरुवारी दुपारी तीन वाजता घडली.
दरीबडची ते जालिहाळ खुर्द रस्त्यावरील हटयाळवाडी येथे शिवनिंग गुरबसू जामगोंड कुटुंबासमवेत शेतातील छपरात रहातात. दुपारी छपरास अचानक आग लागली. त्यावेळी घरात कोणीही नव्हते.
उन्हाचा तडाखा, पालापाचोळा असल्याने आगीने क्षणार्धात पेट घेतला. छप्पर जळून खाक झाले. आगीत रोख रक्कम, दोन शेळ्या, भांडी, कपडे, दुचाकी, भुईमूग, बाजरी, तांदूळ, शाळू पोती, दीड तोळे सोने असे एकूण एक लाख ५३ हजार ३०० रुपयांचे नुकसान झाले. त्यांचा संसार उघड्यावर पडला आहे. तलाठी गणेश पवार व संखचे मंडल अधिकारी मनोहर कोळी यांनी घटनास्थळी भेट देऊन पंचनामा केला.
शेळ्यांची धडपड
छपराला लागूनच शेळ्यांचा गोठा आहे. आगीत दोन शेळ्या जळून मृत्युमुखी पडल्या. आगीचे चटके बसल्यावर शेळ्या ओरडू लागल्या. त्यांची केवलवाणी धडपड सुरू होती.