कोकरुड : गवळेवाडी (ता. शिराळ) ग्रामपंचायतीच्या उपसरपंचपदी राष्ट्रवादीच्या दत्तात्रय बाळकृष्ण हाप्पे यांची बिनविरोध निवड करण्यात आली. निवड बैठकीच्या अध्यक्षस्थानी सरपंच कृष्णा ऊर्फ बाबा गोळे होते.
साडेतीन वर्षांपूर्वी ग्रामपंचायत निवडणुकीत लोकनियुक्त सरपंचपदासह सर्व सदस्यांची बिनविरोध निवड झाली होती. यावेळी उपसरपंचपदी भाजपचे विलास गवळी यांची निवड झाली होती. विलास गवळी यांनी काही दिवसांपूर्वी भाजपचा राजीनामा देऊन राष्ट्रवादीमध्ये प्रवेश केला होता. मात्र, राष्ट्रवादीसह भाजपच्या सदस्यांनी आपल्या सर्व सदस्यपदाचे राजीनामे दिल्याने अखेर प्रचिती दूध संघाचे संचालक सुरेश चिंचोलकर यांनी हस्तक्षेप करून सर्व सदस्यांचे राजीनामे परत घेऊन तोडगा काढला होता. ठरल्याप्रमाणे विलास गवळी यांनी राजीनामा दिल्याने मंगळवारी उपसरपंचपदाची निवडणूक घेण्यात आली. त्यामध्ये दत्ता बाळकृष्ण हाप्पे यांचा एकमेव अर्ज आल्याने त्यांची उपसरपंचपदी बिनविरोध निवड करण्यात आली.
नूतन उपसरपंच दत्ता हाप्पे यांचा सत्कार सुरेश चिंचोलकर यांच्या हस्ते करण्यात आला. यावेळी सरपंच बाबासाहेब गोळे, विलास गवळी, विष्णू खटाटे, शोभा कुंभार, सविता काब्दुले, शिवाजी हाप्पे, जालिंदर हाप्पे, आदिक हाप्पे, तानाजी हाप्पे, सुरेश कांबळे, सुभाष काब्दुले, प्रताप हाप्पे, प्रकाश शेवाळे उपस्थित होते.
फोटो-२२कोकरुड१
फोटो ओळ : गवळेवाडी (ता. शिराळ) येथे नूतन उपसरपंच दत्ता हाप्पे यांचा सुरेश चिंचोलकर यांच्या हस्ते सत्कार करण्यात आला. यावेळी सरपंच बाबासाहेब गोळे, विलास गवळी, विष्णू खटाटे, शोभा कुंभार, सविता काब्दुले, शिवाजी हाप्पे, जालिंदर हाप्पे उपस्थित होते.
फोटो-२२दत्तात्रय हाप्पे