आष्टा : आष्टा ग्रामीण रुग्णालयात सोमवारपासून १८ ते ४४ वर्षे वयोगटातील नागरिकांच्यासाठी लसीकरण मोहीम सुरू करण्यात आली. पहिल्याच दिवशी २०० ऐवजी १८५ नागरिकांना लसीकरण करण्यात आले तर मंगळवारी १८२ नागरिकांचे लसीकरण करण्यात आले यात बाहेरगावच्या नागरिकांना संधी मिळाली.
आष्टा ग्रामीण रुग्णालयात १८ ते ४४ वर्षे वयोगटातील नागरिकांना कोरोना लसीकरण करण्यासाठी ऑनलाइन नोंदणी करावी लागणार आहे. कोविन अ‍ॅपवर नोंदणी झाल्यानंतरच दुसऱ्या दिवशी लसीकरण करण्यात येणार आहे मात्र ऑनलाईन नोंदणी न झाल्यास लसीकरण होणार नाही.
याबाबत अनेक नागरिकांना शंका असल्याने त्यांनी ग्रामीण रुग्णालय लसीकरण केंद्रात गर्दी केली होती. यावेळी सहाय्यक पोलीस निरीक्षक मनोज सुतार व सहकारी यांनी घटनास्थळी धाव घेतली. पोलिसांच्या आगमनानंतर लसीकरण सुरू झाले मात्र अनेकांची कोविन अ‍ॅपवर नोंदणीच होत नसल्याने गोंधळ उडाला.
ग्रामीण रुग्णालयाचे अधिष्ठाता डॉ. संतोष निगडी यांनी ऑनलाईन नोंदणी केल्यानंतरच लसीकरण होणार असल्याने ग्रामीण रुग्णालय प्रशासनाचा नाईलाज आहे असे सांगितले. ऑनलाईन नोंदणीनंतरच आम्ही लसीकरण करणार आहोत.
आष्टा ग्रामीण रुग्णालयात १८ वर्षावरील नागरिकांचे लसीकरण सुरू असल्याने ४५ वर्षावरील नागरिकांनी आष्टा ऐवजी बागणी, बावची व दुधगाव या ठिकाणी गेल्यास त्यांनाही लस मिळणार आहे.
चौकट
स्थानिकांना लस कधी
आष्टा शहरातील ग्रामीण रुग्णालयात १८ ते ४४ वर्षे वयोगटातील नागरिकांना कोव्हॅक्सिन लस देण्यात येत आहे. या ठिकाणी आष्टा शहरातील अत्यल्प नागरिकांना लस मिळत आहे. सांगली, कराड, कोल्हापूरसह बाहेरील नागरिक ऑनलाईन नोंदणी करून लस घेत आहेत. यामुळे स्थानिक नागरिकांना लस मिळणार का? असा प्रश्न उपस्थित होत आहे.