कुपवाड येथील खारे मळा परिसरातील सनी जैन हा रेकॉर्डवरील गुन्हेगार होता. गत महिन्यात त्याचा भाऊ शशांक उर्फ चिट्या पारसमल जैन (वय २०) याने घरगुती भांडणातून सनीचा खून केला. खूनप्रकरणी चिट्या जैन यास पोलिसांनी अटक केली असून तो न्यायालयीन कोठडीत आहे. सनी जैन याच्याविरुद्ध मारामाऱ्या, चोरी व खंडणी बाल लैंगिक अत्याचार असे सात गुन्हे दाखल असल्याने कुपवाड औद्योगिक वसाहत पोलिसांनी त्याच्याविरुद्ध गतवर्षी मिरज प्रांताधिकाऱ्यांकडे हद्दपारीचा प्रस्ताव पाठविला होता. हद्दपार प्रस्तावाच्या सुनावणीस तीन वेळा तो गैरहजर होता. सुनावणी पूर्ण झाल्यानंतर त्याचा दोन आठवड्यापूर्वी खून झाला. मात्र त्याच्या मृत्यूबाबत पोलिसांनी कळविले नसल्याने प्रांताधिकारी समीर शिंगटे यांनी दि. ८ फेब्रुवारी रोजी सनी जैन यास सांगली व कोल्हापूर जिल्ह्यातून एक वर्षासाठी हद्दपारीचा आदेश पोलिसांना दिला आहे. यातील आरोपीचा मृत्यू झाला असल्याने त्याचा मृत्यू दाखला हजर करुन हद्दपारीचा आदेश रद्द करण्यात येणार असल्याचे पोलिसांनी सांगितले.
फाेटाे : १० सनी जैन