इस्लामपूर : सांगली जिल्ह्यातील कोरोना संसर्गाचा वाढता प्रादुर्भाव रोखण्यासाठी प्रशासनाच्या सर्व यंत्रणांमध्ये समन्वय राखत ग्रामसुरक्षा समिती आणि वॉर्ड सुरक्षा समितीच्या माध्यमातून सर्वांनी सामूहिक पद्धतीने काम करावे, असे आवाहन जिल्हा पोलीस प्रमुख दीक्षित गेडाम यांनी केले. यापुढे कोविड नियमावलीचा भंग करणाऱ्यांविरुद्ध फौजदारी गुन्हे दाखल करण्याचे आदेश त्यांनी दिले.
येथील पोलीस उपअधीक्षक कार्यालयात वाळवा तालुक्यातील सर्व प्रशासकीय अधिकाऱ्यांसमवेत गेडाम यांनी आढावा बैठक घेतली. या बैठकीत तालुक्यातील कोरोना संसर्गाची स्थिती आणि त्यासाठी करण्यात येत असलेल्या उपाययोजनांची गेडाम यांनी माहिती घेतली. यावेळी प्रांताधिकारी विजय देशमुख, तहसीलदार रवींद्र सबनीस, दीक्षांत देशपांडे, मुख्याधिकारी अरविंद माळी, गटविकास अधिकारी शशिकांत शिंदे, तालुका आरोग्याधिकारी डॉ. साकेत पाटील उपस्थित होते.
गेडाम म्हणाले, कोरोना संसर्गाचा प्रादुर्भाव रोखण्यासाठी गावागावातील ग्रामसुरक्षा समिती आणि शहरातील वॉर्ड सुरक्षा समिती सक्रिय करण्यावर अधिकाऱ्यांनी भर द्यावा. या समित्यांच्या माध्यमातून गृहविलगीकरणात उपचार घेणारे रुग्ण, विनाकारण बाहेर फिरणारे नागरिक, मास्कचा वापर न करणारे नागरिक यांच्यावर लक्ष ठेवले जाणार आहे. समितीकडून मिळणाऱ्या माहितीच्या आधारे अशा व्यक्तींवर गुन्हे दाखल करण्याची कारवाई केली जाईल.
ज्या परिसरात कोरोनाबाधित रुग्ण असतील तेथे मायक्रो कंटेन्मेंट झोन केले जाणार आहेत, तसेच जेथे कोरोनाबाधितांची संख्या मोठ्या प्रमाणात असेल, असे हॉटस्पॉटचे परिसर सील केले जाणार आहेत. छोटे कार्यक्रम, लग्न समारंभ यामधूनही जर कायद्याचा भंग होत असेल तर त्यांच्यावरही कठोर कारवाई करण्याचे निर्देश गेडाम यांनी दिले. भाजीपाला खरेदीवरून होणारी गर्दी टाळण्यासाठी भाजी विक्रेत्यांना घरोघरी जाऊन व्यवसाय करण्याची सूचना त्यांनी केली. लसीकरणाच्या ठिकाणी अवास्तव गर्दी होणार नाही यासाठी सुरक्षा समित्यांनी भागनिहाय लसीकरणाचे नियोजन करावे.