सांगली : महापालिकेत भाजपचे बहुमत आहे. सर्व नगरसेवक एकसंघ असून, भाजपचाच महापौर, उपमहापौर होणार, असा दावा शहर जिल्हाध्यक्ष दीपक शिंदे-म्हैैसाळकर यांनी केला, तर भाजपकडून जनता व नगरसेवकांचा अपेक्षाभंग झाला असून, त्यांच्यातील नाराजामुळे सत्ता परिवर्तन होईल, असे काँग्रेसचे शहर जिल्हाध्यक्ष पृथ्वीराज पाटील यांनी सांगितले.
महापौर, उपमहापौर पदाचे उमेदवारी अर्ज दाखल केल्यानंतर ते पत्रकारांशी बोलत होते. दीपक शिंदे म्हणाले की, महापालिकेत भाजपची एकहाती सत्ता आहे. पक्षाचे ४१ व दोन सहयोगी असे ४३चे बहुमत आमच्याकडे आहे. त्यामुळे महापौर व उपमहापौर भाजपचाच होणार. खुल्या गटासाठी महापौरपद आरक्षित असल्याने इच्छुकांची संख्या जास्त होती. सगळ्यांचेच समाधान करता आले नाही, त्यामुळे काहीजण नाराज असणे स्वाभाविक आहे. परंतु, ते पक्षासोबत आहेत. येत्या अडीच वर्षात तीन महापौर, उपमहापौर व गटनेते केले जाणार आहेत. त्यामुळे सर्वांना कोणत्या ना कोणत्या पदावर काम करण्याची संधी मिळेल. काही नगरसेवक वैयक्तिक कामांमुळे तसेच लग्न, आजारपणामुळे बैठकीला आले नसल्याचे सांगितले.
पृथ्वीराज पाटील म्हणाले की, गेल्या अडीच वर्षात भाजपकडून सामान्य नागरिकांसह नगरसेवकांचाही अपेक्षाभंग झाला आहे. शहरात विकासकामे झालेली नाहीत. अंतर्गत मतभेदांमुळे अनेक नगरसेवक नाराज आहेत. या नाराजांची साथ आम्हाला मिळेल. महापौर व उपमहापौर काॅंग्रेस, राष्ट्रवादीचेच होतील. यासाठी अर्ज जरी दोन्ही पक्षांनी भरले असले तरी आम्ही सुंयक्तपणे ही निवडणूक लढविणार आहोत. पालकमंत्री जयंत पाटील, मंत्री विश्वजीत कदम, जयश्रीताई पाटील, विशाल पाटील यांच्याशी चर्चा करून दोन्ही पदांसाठी दोन्ही पक्षातून एक-एक अर्ज ठेवला जाईल, असे सांगितले.