कवठेमहांकाळ : येणाऱ्या नगरपंचायत, जिल्हा परिषद, बाजार समितीच्या निवडणुका काँग्रेस पक्ष मोठ्या ताकदीने स्वबळावर लढवेल. जिल्ह्यात पुन्हा काँग्रेस उभारी घेईल, असा विश्वास काँग्रेसचे प्रदेश उपाध्यक्ष विशाल पाटील यांनी व्यक्त केला.
विशाल पाटील हे सोमवारी कवठेमहांकाळ दौऱ्यावर आले होते. यावेळी कवठेमहांकाळ तालुक्यातील कार्यकर्त्यांनी व काँग्रेस पक्षाच्या वतीने त्यांचा सत्कार करण्यात आला. तालुक्यातील कोकळे येथे धनाजीराव पाटील यांनी विशाल पाटील यांचा सत्कार केला. कवठेमहांकाळ शहरामध्ये काँग्रेस पक्षाच्या वतीने काँग्रेसचे प्रदेश सदस्य माणिकराव भोसले, तालुकाध्यक्ष संजय हजारे, कार्याध्यक्ष अविराजे शिंदे यांच्या हस्ते विशाल पाटील यांचा सत्कार करण्यात आला.
विशाल पाटील म्हणाले की, आता जिल्ह्यातील कार्यकर्त्यांनी गट-तट विसरून मोठ्या जोमाने कामाला लागावे. आमच्या नेतेमंडळींमध्येही कोणताही गट-तट अथवा भेदभाव नाही. आम्ही कुठेही नाराज नाही. आम्ही काँग्रेस पक्ष जिल्ह्यात वाढवण्यासाठी एकत्रित येऊन पुन्हा एकदा काँग्रेस ताकदीने उभा करू.
यावेळी प्रा. दादासाहेब ढेरे, चैतन्य पाटील, राजाराम घोरपडे, रमेश कोळेकर, धनाजीराव पाटील उपस्थित होते.