जत : डफळापूर (ता. जत) येथील राष्ट्रीय पेयजल योजनेचे काम अंतिम टप्प्यात असून अल्पावधीत या योजनेतून पाणी सोडून चाचणी घेण्यात येईल. वीज वितरण कंपनी व वाडी वस्तीवरील पाइपलाइनचे अपूर्ण काम त्वरित पूर्ण करून घ्यावे, अशी सूचना राज्याचे सहकार व कृषी राज्यमंत्री विश्वजीत कदम यांनी केली.
डफळापूर येथील पाणी योजनेची पाहणी करण्यासाठी आले असताना कदम बोलत होते.
डफळापूर शहराची लोकसंख्या सुमारे पंधरा हजार गृहीत धरून २०११ मध्ये डफळापूर राष्ट्रीय पेयजल योजनेला शासनाकडून मान्यता मिळाली. सात कोटी ५० लाख रुपये खर्च प्रस्तावित असलेल्या या योजनेचे काम २०११ मध्ये सुरू झाले. माजी सभापती सुनील चव्हाण यांच्या निधनानंतर या योजनेचे काम रखडले. परंतु दिग्विजय चव्हाण पंचायत समिती सदस्य झाल्यानंतर या योजनेच्या कामाला गती आली आहे. बसाप्पावाडी (ता. कवठेमहांकाळ) येथील साठवण तलावात जॅकवेल बसवून डफळापूर गावापासून एक किलोमीटर अंतरावर असलेल्या डफळापूर ते बाज रस्त्यावरील एकवीरा देवीच्या मंदिराजवळ जलशुद्धीकरण प्रकल्पात पाणी आणून तेथून डफळापूर शहर व वाडी-वस्तीवर देण्यात येणार आहे.
पाइपलाइनचे काम पूर्ण झाले असून वाडी-वस्तीवरील पाइपलाइनचे काम अपूर्ण आहे. सध्या महावितरणकडून विद्युत जनित्र बसवून वीजपुरवठा करण्याचे काम बाकी आहे. हे काम त्वरित पूर्ण करून द्यावे, अशी सूचना कदम यांनी महावितरणच्या अधिकाऱ्यांना केली. त्यामुळे या कामाला गती मिळाली आहे. वीज जोडणी झाल्यानंतर डफळापूर गावात पाणीपुरवठा करण्यात अडचण येणार नाही. वाडी-वस्तीवरील काम अद्याप अपूर्ण आहे. ते त्वरित पूर्ण करा, अशी सूचना कदम यांनी पाणीपुरवठाच्या अधिकाऱ्यांना केली.
या वेळी आमदार विक्रम सावंत, जिल्हा परिषद सदस्य महादेव पाटील, माजी सभापती बाबासाहेब कोडग, पंचायत समिती सदस्य दिग्विजय चव्हाण, बाजार समिती संचालक अभिजित चव्हाण, तांत्रिक सल्लागार के.डी. मुल्ला, ॲड. युवराज निकम, आप्पाराया बिराजदार उपस्थित होते.