अ‍ॅपेक्समधील उपचाराबाबत रुग्णांच्या नातेवाइकांच्या तक्रारी

मिरजेतील अ‍ॅपेक्स रुग्णालयात ८७ रुग्णांच्या मृत्यूप्रकरणी रुग्णालय चालक डाॅ. महेश जाधव याच्याविरुद्ध सदोष मनुष्यवधाचा गुन्हा दाखल करून पोलिसांनी डाॅ. जाधव बंधूंसह १० जणांना अटक केली आहे. डॉ. जाधव बारा दिवस पोलीस कोठडीत असून बुधवारी पोलीस कोठडी संपत असल्याने बुधवारी त्यास मिरज न्यायालयात हजर करण्यात येणार आहे. रुग्णांच्या उपचाराची खोटी कागदपत्रे तयार करण्यासाठी मदत केल्याचे पोलिसांच्या चाैकशीत निष्पन्न झाल्याने त्याचा भाऊ मेंदू शस्त्रक्रियातज्ज्ञ डॉ. मदन जाधव हासुद्धा कोठडीत आहे. रुग्णालयात मृत रुग्णांच्या १७ नातेवाइकांनी डाॅ. जाधव याच्याविरुद्ध उपचारात हलगर्जीपणा केल्याची व जादा बिले घेतल्याची तक्रार दिली आहे. अ‍ॅपेक्समध्ये कमिशनवर रुग्ण आणणाऱ्या तीन रुग्णवाहिका चालकांना पोलीस ठाण्यात पाचारण करून त्यांचे जबाब नोंदविण्यात आले. अ‍ॅपेक्सप्रकरणी पोलिसांच्या अटकसत्रामुळे सांगली मिरजेत वैद्यकीय क्षेत्रात खळबळ उडाली आहे.