लोकमत न्यूज नेटवर्क
इस्लामपूर : कृष्णा कारखान्याच्या रणांगणातून तिन्ही पॅनलमधून तिन्ही गटांचे वेगवेगळे उमेदवार आमने-सामने आहेत. इस्लामपूर पालिका सहा महिन्यांवर आली आहे. कृष्णाच्या निवडणुकीत माजी नगराध्यक्ष, माजी नगरसेवक आणि माजी नगराध्यक्षांच्या घरातील उमेदवार आहेत. त्यामुळे कृष्णा निवडणूक इस्लामपूर मर्यादित पालिकेची रंगीत तालीम ठरेल. गटाची ताकदही दिसेल.
पालिकेच्या राजकारणात उरूण परिसरातील नेत्याचे वर्चस्व आहे. या परिसरातच ८०० सभासद आहेत. सत्ताधारी सहकार पॅनलचे उमेदवार संजय पाटील हे उरूण परिसरातील आहेत. त्यांच्या घरात तीस वर्षांहून अधिक काळ पालिकेच्या राजकारणाचा वारसा आहे. सध्या त्यांचे बंधू शहाजी पाटील राष्ट्रवादीचे नगरसेवक आहेत. माजी नगराध्यक्ष विजयभाऊ पाटील यांचे संजय पाटील चुलत बंधू आहेत. पालिकेत विजयभाऊ पाटील यांचा भक्कम गट होता. त्यांच्या निधनानंतर या गटाची जबाबदारी शहाजीबापू पाटील यांच्यावर आहे. त्यामुळे यावेळी ते सहकार पॅनलकडे आपल्या गटाची ताकद आजमावत आहेत.
रयत पॅनलकडून माजी नगराध्यक्ष आनंदराव मलगुंडे उमेदवार आहेत. सध्या ते विद्यमान नगरसेवक आहेत. त्यांच्या घरात पालिकेचा राजकीय वारसा आहे. शहरातील राजकारणात माजी मंत्री अण्णासाहेब डांगे यांचे ते समर्थक आहेत. पालिकेत डांगे गटाचे अस्तित्व आहे. त्याचे नेतृत्व ॲड. चिमण डांगे करतात. विजयभाऊ गट आणि डांगे गट यांचे सख्य पाहता या दोन्ही गटांची ताकद दिसणार आहे.
आगामी पालिका निवडणुकीतही या दोन्ही घरांतील राष्ट्रवादीतून उमेदवारी निश्चित आहे. यामुळे कृष्णा कारखान्याच्या निवडणुकीत इस्लामपुरात कोण बाजी मारणार, याकडे लक्ष लागून राहिले आहे.
संस्थापक पॅनलमधून माजी नगरसेवक शिवाजी पवार यांना उमेदवारी देण्यात आली आहे. पवार यांना विजयभाऊ पाटील यांच्या शिफारसीने स्वीकृत नगरसेवकपद राष्ट्रवादीने दिले तेव्हा हा वादाचा मुद्दा झाला. शिवाजी पवार यांना नगरसेवकपदाचा राजीनामा द्यावा लागला. पालिकेत विकास आघाडीची सत्ता आल्यानंतर पवार यांनी विकास आघाडीशी जवळीक साधली आहे. सहकार आणि रयत पॅनलने जयंत पाटील समर्थकांना उमेदवारी दिली, तर संस्थापक पॅनलने राष्ट्रवादीविरोधी शिवाजी पवार यांना उमेदवारी देऊन खेळी केली आहे. पवार यांच्या पाठीशी पालिकेतील सत्ताधारी विकास आघाडीचे उपाध्यक्ष वैभव पवार आहेत.
उरूण परिसरात सभासदाची संख्या ८०० च्या आसपास आहे. या परिसरात उपनगराध्यक्ष दादासाहेब पाटील, पालिकेतील पक्षप्रदोत विक्रमभाऊ पाटील, माजी नगराध्यक्ष भगवानराव पाटील, माजी उपनगराध्यक्ष बी.ए. पाटील, पालिकेतील शिवसेनेचे गटनेते आनंदराव पवार, आजी-माजी नगरसेविकांची संख्या मोठी आहे. पाटील, पवार, जाधव यांचा भाऊपणा आहे, तसेच विविध गटांत सभासद आहेत. त्यामुळे इस्लामपुरातील तिरंगी लढतीत बाजी कोण मारणार, याकडे सर्वांचे लक्ष लागून आहे.
चौकट
तिन्ही गट जोमात
शिवाजी पवार यांना सत्ताधारी विकास आघाडीतील नगरसेवकांचा पाठिंबा मिळेलच; पण त्यासोबत महाडिक गटाची भूमिका महत्त्वाची ठरणार आहे. सहकार पॅनलने जयंत पाटील समर्थकांना उमेदवारी दिली आहे, तर रयत पॅनलने डांगे गटाचे आनंदराव मलगुंडे यांना उमेदवारी देऊन सहकाराला आव्हान उभे करण्याचा प्रयत्न केला आहे. त्यामुळे इस्लामपुरातील कृष्णाची निवडणूक तिन्ही गटांत विभागली आहे.