लोकमत न्यूज नेटवर्क
सांगली : शहर व परिसरात घरफोडी, जबरी चोरी करणाऱ्या टोळीला जेरबंद करण्यात स्थानिक गुन्हे अन्वेषण विभागाच्या पथकाला यश आले. अटक करण्यात आलेल्या तिघांकडून ५० हजार रुपयांचा मुद्देमाल जप्त करण्यात आला असून, दहा गुन्हेही उघडकीस आले आहेत.
गेंडा उर्फ आकाश संतोष जाधव (वय १९, रा वाल्मीकी आवास), करण रामा पाटील ( २१, शहालुल्लानगर, कुपवाड एमआयडीसी), रोहित बाळू सपाटे (१९, रा. राजीव गांधी झोपडपट्टी, वाल्मीकी आवासजवळ) अशी अटक केलेल्या संशयितांची नावे आहेत.
याबाबत अधिक माहिती अशी की, सांगली शहर व ग्रामीण पोलिस ठाण्याच्या हद्दीत पेट्रोलिंग करीत असताना एलसीबीचे निरीक्षक सर्जेराव गायकवाड यांना पंचशीलनगर रेल्वे गेटजवळ आकाश जाधव व करण पाटील हे दोघेजण पैश्याच्या कारणावरून भांडत असल्याची माहिती मिळाली. त्यानुसार एलसीबीच्या पथकाने घटनास्थळी घेतली. यावेळी आकाश व करण हे दोघेजण समाजकल्याण कार्यालयाच्या प्रवेशद्वाराजवळ दंगा करीत होते. पोलिसांनी दोघांनाही ताब्यात घेतले. आकाश याची झडती घेतली असता त्याच्याकडे सोन्या-चांदीचे दागिने, रोख रक्कम व एक टॅब, तर करण याच्याकडे सोन्याचे नाणे व एक फूलसाखळी मिळून आली, तर करण पाटील याच्याकडे सोन्याचे एक नाणे व कानातील फूलसाखळी असा चोरीचा माल मिळून आला.
या मुद्देमालाबाबत पोलिसांनी कसून चौकशी केली असता वाल्मीकी आवासमधील एका बंद घरातून सोने-चांदीचे दागिने चोरल्याची कबुली आकाश जाधव याने दिली.
पोलिसांनी खाक्या दाखविताच आकाश याने मित्र करण गायकवाड व एका अल्पवयीन मुलासोबत बायपास रोडवर एका वृद्ध व्यक्तीच्या हातावर दांडके मारून त्यांचा मोबाइल चोरल्याचे सांगितले. याशिवाय गणेश शाॅपिंग सेंटरमधून काही दुकाने फोडून रोकड चोरली होती. बायपासरोडवरील एका कार्यालयातून टॅब चोरल्याचीही कबुली दिली. लठ्ठे सोसायटी व पंचशीलनगरमध्येही चोरीचा प्रयत्न केला होती. पण लोकांनी पाठलाग केल्याने तो अयशस्वी झाल्याचेही आकाश याने पोलिसांनी सांगितले. या तिघांकडून सोन्याचे मंगळसुत्र, कानातील रिंगा, सोन्याची ठुशी, फुले, चांदीचे बिजोड्या, जोडवी, अंगठ्या, चांदीची आरती, मोबाईल व रोकड असा ५० हजार ७७० रुपयांचा मुद्देमाल पोलिसांनी जप्त केला आहे.
चौकट
टोळीवर अनेक गुन्हे
आकाश जाधव, करण पाटील व रोहित सपाटे या तिघांच्या टोळीवर सांगली शहर पोलीस ठाण्यात नऊ घरफोडी, जबरी चोरीचे तर संजयनगर पोलीस ठाण्याच्या हद्दीत प्रत्येकी एक घरफोडीचा गुन्हा दाखल आहे. आतापर्यंत पोलिसांनी दहा गुन्हे उघडकीस आणले आहेत.