अशोक पाटील
लोकमत न्यूज नेटवर्क
इस्लामपूर : सहा महिन्यांवर येऊन ठेपलेली इस्लामपूर नगरपालिका निवडणूक महाडिक समर्थकांनी भाजपच्या चिन्हावर लढविणार असल्याचे घोषित केले आहे. पालिकेत भाजपची थेट एन्ट्री होण्यासाठी प्रयत्न करणार असल्याची ग्वाही महाडिक बंधू देत असले तरी मागील निवडणुकीत राष्ट्रवादीविरोधात तयार करण्यात आलेल्या विकास आघाडीचे काय, असा प्रश्न उपस्थित होत आहे.
मागील विधानसभा निवडणुकीनंतर महाडिक युवाशक्तीचे राहुल आणि सम्राट महाडिक यांनी भाजपमध्ये प्रवेश केला. भाजपने या दोघांनाही पक्षवाढीसाठी राज्य पातळीवर पदे दिली आहेत. त्यामुळे वाळवा, शिराळ्यात पक्षबांधणीचे काम जोरात सुरू आहे. परंतु त्यांना भाजपमधीलच काही नेत्यांची साथ मिळत नाही. असे असले तरी आगामी पालिका निवडणुकीत कमळ चिन्ह घेऊन लढण्याचा निर्धार महाडिक समर्थकांनी केला आहे. नगरसेवक अमित ओसवाल, माजी नगरसेवक कपिल ओसवाल, सतीश महाडिक, जलाल मुल्ला, मन्सूर मोमीन, चेतन शिंदे, बंडा रासकर, रुपाली साळुंखे, अॅड. फिरोज मगदूम, विशाल शिंदे यांच्यासह महाडिक समर्थकांनी तसे सांगितले आहे.
मागील पालिका निवडणुकीआधी विकास आघाडीची मोट बांधण्यात दिवंगत नानासाहेब महाडिक यांचे मोठे योगदान होते. या आघाडीत शिवसेनेचाही सहभाग आहे. त्यातच इस्लामपुरात भाजपमध्येच दुफळी आहे. त्यामुळेच आता भाजपच्या चिन्हावर लढताना अंतर्गत मतभेदाचा मुद्दा उपस्थित होणार आहे. मग या आघाडीतील शिवसेना, कॉँग्रेस आणि इतर घटक पक्षांचे काय? हेही प्रश्न उपस्थित होणार आहेत.
कोट
मागील पालिका निवडणुकीत राष्ट्रवादीविरोधात सर्वपक्षीय नेते विकास आघाडीच्या झेंड्याखाली एकत्र आले होते. आगामी निवडणुकीतही विकास आघाडीची मोट बांधण्यासाठी सर्वांना एकत्र करण्याचा प्रयत्न करू.
-आनंदराव पवार, जिल्हाप्रमुख तथा गटनेते, शिवसेना, इस्लामपूर नगरपालिका