सांगली : महापालिका हद्दीतील कोविड रुग्णालये, केअऱ सेंटरमधील ऑक्सिजन प्लॅन्ट व त्यांच्या वितरण व्यवस्थेचे ऑडिट करण्यात येत आहे. तसेच ऑक्सिजन गळती, आगीसारख्या घटना टाळण्यासाठी फायर, इलेक्ट्रिकल व स्ट्रक्चरल ऑडिटही केले जात असल्याचे आयुक्त नितीन कापडणीस यांनी पत्रकार बैठकीत सांगितले.
नाशिक महापालिका रुग्णालयातील ऑक्सिजन गळतीने बुधवारी २४ रुग्णांचा मृत्यू झाला. या घटनेची दखल आयुक्तांनी घेतली. ते म्हणाले की, ऑक्सिजन प्लॅन्टला गळती लागू नये, प्लॅन्ट ते रुग्णालयातील बेडपर्यंतची वितरण व्यवस्था सुरळीतपणे सुरू राहावी, रुग्णांना आवश्यक प्रमाणात ऑक्सिजनचा पुरवठा व्हावा, त्यात बिघाड होऊन रुग्णांना ऑक्सिजन कमी पडू नये, यासाठी कोविड रुग्णालये, केअऱ सेंटर आणि हेल्थ सेंटरचे ऑडिट करण्याचे काम सार्वजनिक बांधकाम विभागाकडून सुरू आहे. त्याशिवाय फायर, इलेक्ट्रिक व स्ट्रक्चरल ऑडिटचे कामही हाती घेतले आहे. जिल्ह्यात कुठलीही दुर्घटना होऊ नये, यासाठी प्रशासन दक्ष असल्याचेही त्यांनी सांगितले.
ऑक्सिजन संपला आणि ऑक्सिजनअभावी रुग्णाचे हाल झाले, असा एकही प्रकार घडलेला नाही. रेमडेसिविर उपलब्धतेबाबत अन्न व औषध प्रशासनचे अधिकारी व प्रशासन यांच्यात चांगला समन्वय असल्याचेही ते म्हणाले.
चौकट
कुंभमेळ्यातून आलेल्यांची अँटिजेन चाचणी
महापालिका हद्दीत कुंभमेळ्यातून १४ ते १६ भाविक आले आहेत. त्यांची यादी रेल्वे प्रशासनाने महापालिकेकडे दिली आहे. या भाविकांची रॅपिड अँटिजेन चाचणी करून त्यांना घरीच विलगीकरण केले जाईल. त्यानंतर लक्षणे असतील तर आरटीपीसीआर चाचणीही करणार असल्याचे कापडणीस यांनी सांगितले.
चौकट
‘बेल्लारी’तून होणार ऑक्सिजन पुरवठा
कर्नाटकातील बेल्लारी येथून जिल्ह्यासाठी ऑक्सिजनचा पुरवठा होणार आहे. तेथील स्टील प्लॅन्टमधून ऑक्सिजन येत आहे. केंद्र, राज्य शासनाकडून ऑक्सिजनचा पुरवठा होत आहे. त्यामुळे ऑक्सिजनचा तुटवडा भासणार नाही, असा विश्वासही कापडणीस यांनी व्यक्त केला.