गुहागर : तालुक्यातील ७ लसीकरण केंद्रांतून लसीकरण सुरू आहे. वाढत्या कोरोनामुळे लसीकरणासाठी ग्रामस्थांची गर्दी वाढत असतानाच केवळ आजच्या दिवस पुरेल एवढेच लसीकरणाचे डोस तालुका आरोग्य विभागाकडे असल्याने बुधवारपासून लसीकरण बंद ठेवावे लागते की काय? अशी स्थिती निर्माण झाली आहे.
गुहागर तालुक्यात तळवली, चिखली, आबलोली, कोळवली, हेदवी ही पाच प्राथमिक आरोग्य केंद्रे, वेळंब उपकेंद्र व गुहागर ग्रामीण रुग्णालय अशा सात केंद्रांतून लसीकरण होत आहे. सुरुवातीला केवळ दोनच केंद्रे होती. लसीकरणाचा वेग वाढविण्यासाठी आणखी ५ केंद्रे वाढविण्यात आली आहेत. ६० वर्षांपुढील लोकांसाठी तसेच ४५ ते ६० वयोमर्यादेमधील लोकांना दुर्धर आजार असेल तरच लस दिली जात होती. हा निकष बदलून सरसकट ४५ वर्षांपुढील सर्वांनाच लस दिली जाणार असल्याचे जाहीर करण्यात आल्याने लस घेणाऱ्यांची संख्या वाढते आहे. तसेच वाढत्या कोरोना रुग्ण संख्येमुळेही भीतीपोटी अनेकजण पुढे होऊन लस घेण्यासाठी येत आहेत.
तालुक्यात सुरुवातीच्या काळात कोव्हॅक्सिनचा १४३४ लोकांनी डोस घेतला तर कोव्हिशिल्डचा ३०८३ लोकांनी पहिला डोस तर ७५७ जणांनी दुसरा डोस घेतला आहे. टप्प्याटप्प्याने शासनाकडून लसीकरण केंद्रावर लसीचा पुरवठा होत आहे. मात्र, गेले दोन दिवस आवश्यक लस पुरवठा न झाल्याने आजच्या दिवशी पुरेल एवढाच लस साठा केंद्रावर उपलब्ध आहे.
मंगळवारी लसअभावी आबलोली प्राथमिक आरोग्य केंद्रातील लसीकरण थांबविण्यात आले आहे. बहुतांशी केंद्रावर लसीचा साठा संपतो आहे हे लक्षात येताच आज सकाळी तातडीने दापोली येथून १५० लस साठा गुहागर तालुक्यासाठी देण्यात आला. मात्र, जिल्ह्यात लस साठा संपत चालल्याने बुधवारपासून लसीअभावी लसीकरण केंद्रे बंद ठेवावी लागतात की काय अशी स्थिती निर्माण झाली आहे.