सुर्वे यांचा सत्कार
रत्नागिरी : राष्ट्रवादी काँग्रेसच्या रत्नागिरी तालुकाध्यक्षपदी राजन सुर्वे यांची निवड झाल्याबद्दल आमदार शेखर निकम यांच्याहस्ते सत्कार करण्यात आला. यावेळी प्रांतिक सदस्य बशीर मुर्तुझा, जिल्हाध्यक्ष बाबाजी जाधव, महिला जिल्हाध्यक्ष चित्रा चव्हाण, रत्नागिरी पक्षप्रतोद सुदेश मयेकर उपस्थित होते.
विशेष भत्त्याची मागणी
रत्नागिरी : मालवाहतूक करणाऱ्या चालकांना येणाऱ्या समस्या विचारात घेऊन त्या तातडीने दूर कराव्यात, चालकांना मुक्कामासाठी लागणारा वेळ, नाष्टा, जेवणाची गैरसोय विचारात घेऊन कर्मचाऱ्यांना दररोज ३०० रुपये विशेष भत्ता देण्यात यावा, अशी मागणी महाराष्ट्र एस. टी. कामगार संघटनेतर्फे करण्यात आली आहे.
ऑक्सिजन कॉन्सन्ट्रेटर
दापोली : येथील अनुबंध संस्थेतर्फे खानबहाद्दूर मेमोरिअल हॉस्पिटलला गरीब व गरजू रुग्णांसाठी ऑक्सिजन कॉन्सन्ट्रेटर देण्यात आला. हे यंत्र कसे चालवावे, याचे प्रात्यक्षिकही सादर करण्यात आले. यावेळी डॉ. अनिरुद्ध डोंगरे, वरूण वालावलकर, ओंकार कर्वे, डॉ. मुनीर सरगुरोह उपस्थित होते.
एटीएम सेवा कोलमडली
देवरूख : चक्रीवादळामुळे संगमेश्वर तालुक्यातील ग्रामीण व शहरी भागातील यंत्रणा कोलमडली होती. हळूहळू जनजीवन पूर्वपदावर येत असून, वीजपुरवठाही सुरळीत झाला आहे. मात्र, बँकांची एटीएम सेवा मात्र अद्याप कोलमडलेली आहे. यामुळे शहरी तसेच ग्रामीण भागातील ग्राहकांची गैरसोय होत आहे.
साहित्य वाटप
देवरूख : संगमेश्वर तालुक्यातील भडकंबा ग्रामपंचायतीतर्फे गरजूंना साहित्य वाटप करण्यात आले. कोरोना महामारीमुळे अनेक कुटुंबांना उदरनिर्वाह करणे कठीण झाले आहे. त्यामुळे ग्रामपंचायतीतर्फे मदतीचा हात देण्यात आला आहे. सरपंच शेखर आकटे, ग्रामपंचायत सदस्य संतोष जामसंडेकर उपस्थित होते.
कोरोना केंद्राला मदत
देवरुख : येथील जुने तहसील कार्यालय येथे कोरोना चाचणी केंद्र सुरु करण्यात आले आहे. तालुक्यातील रुग्णचाचणीसाठी येणाऱ्यांची संख्या अधिक आहे. त्यांची गैरसोय होऊ नये, यासाठी ३०० लीटरची पाण्याची टाकी, रुग्णांना बसायला बाकडी, पंखे व विजेची सुविधा उपलब्ध करून देण्यात आली आहे.
निकष बदलण्याची मागणी
देवरुख : आंबा बागायतदारांच्या शिष्टमंडळाने मनसेच्या नेत्यांची भेट घेऊन नुकसानभरपाईचे शासकीय निकष बदलण्याची मागणी केली आहे. मनसे नेते नितीन सरदेसाई व शिरीष सावंत यांनी हा प्रश्न राजदरबारी मांडण्याचे आश्वासन दिले. यावेळी सरचिटणीस मनोज चव्हाण, वैभव खेडेकर, सुनील साळवी उपस्थित होते.
इंजिनियर नियुक्तीची मागणी
रत्नागिरी : रुग्णालयांमध्ये ऑक्सिजन वॉर्डसाठी पाईपलाईनसह इतर सर्व उपकरणे, साधन सामुग्री निकृष्ट दर्जाची वापरली जात असल्याची शक्यता आहे. त्यामुळे शासकीय रुग्णालयांमध्ये बायोमेडिकल, इंजिनिअर नियुक्तीची मागणी करण्यात येत आहे.
शिष्यवृत्ती वाटप
मंडणगड : तालुक्यातील सावित्रीबाई फुले दत्तक पालक योजनेंतर्गत शिष्यवृत्ती अनुदान प्राप्त झाले आहे. जिल्हा परिषद आदर्श शाळा, वाल्मिकीनगर येथे एकूण १४ मुलींना याचा लाभ देण्यात आला. प्रत्येकी ३०० रुपयांची शिष्यवृत्ती प्रदान करण्यात आली. यावेळी मुख्याध्यापक अमरदीप यादव, प्रशिक्षक विश्वनाथ जाधव, सुवर्णा लोणकर आदी उपस्थित होते.