लाेकमत न्यूज नेटवर्क
चिपळूण : गुहागरच्या दिशेने चाललेल्या एका ट्रेलरवरून पोकलेन कलंडून थेट पऱ्यात कोसळल्याची घटना शनिवारी सायंकाळी चिपळूण - गुहागर मार्गावरील कोंढे बौध्दवाडीसमोर घडली. सुदैवाने या अपघातात कोणालाही दुखापत झाली नसली तरी पोकलेन व मुख्य मार्गावरच्या मोरीचे नुकसान झाले आहे.
चिपळूणहून गुहागरच्या दिशेने ट्रेलर चालक पोकलेन घेऊन निघाला होता. कोंढे बौध्दवाडीसमोरील छोट्या वळणावर आला असता, वाहनाच्या गतीमुळे ट्रेलरवर बंद अवस्थेत उभा असणारा पोकलेन कलंडला आणि थेट शेजारच्या पऱ्यात कोसळला. यामध्ये पोकलेनचे काही प्रमाणात नुकसान झाले. सुदैवाने त्या परिसरातील मुख्य व बौध्दवाडीकडे जाणाऱ्या रस्त्यावर कोणतीही व्यक्ती नसल्याने अनुचित प्रकार घडला नाही. या अपघाताचा आवाज एवढा झाला की, वाडीतील अनेक ग्रामस्थांनी घटनास्थळी येत मदतकार्याला सुरूवात केली. काही वेळातच अपघात झालेल्या पोकलेनचा दरवाजा उघडून चालकाने पोकलेनमध्ये प्रवेश केला व अतिशय कौशल्याने त्या पऱ्यातून तो पोकलेन बाहेर काढला. स्थानिक ग्रामस्थांनी चालकाला मदत केली. या अपघातात चिपळूण - गुहागर मार्गावरील मोरीचे आणि पोकलेन मशीनचे मोठ्या प्रमाणावर नुकसान झाले आहे. या अपघातामुळे या मार्गावरची वाहतूक काही वेळासाठी विस्कळीत झाली होती. पावसाळ्याचे दिवस असल्याने या मोरीची लवकरात लवकर डागडुजी करावी, अशी मागणी स्थानिक ग्रामस्थांनी केली आहे.
----------------------------------
चिपळूण तालुक्यातील कोंढे बौध्दवाडी येथे ट्रेलरवरून पोकलेन पडून अपघात झाला. या अपघातात पाेकलेनचे नुकसान झाले.