लोकमत न्यूज नेटवर्क
रत्नागिरी : कोरोना होऊन गेल्यानंतरही अन्य व्याधींनी ग्रासल्याने अनेकांना कित्येक दिवस रुग्णालयात राहूनच उपचार घ्यावे लागतात. हृदयविकार, श्वसनाचा त्रास आदी व्याधी पुन्हा उफाळून आल्याने अशा रुग्णांना पुन्हा रुग्णालयात उपचारासाठी राहावे लागते. सहव्याधी असलेले तसेच ज्येष्ठ नागरिक यांना पोस्ट कोविडचा त्रास अधिक होत आहे. जिल्ह्यात अशा रुग्णांचे प्रमाण २ ते ३ टक्के आहे.
कोमॉर्बिड किंवा ज्येष्ठ नागरिक यांना पोस्ट कोविडचा धोका असतो. जे उपचारासाठीच उशिरा दाखल होतात, अशांच्या फुप्फुसाला हानी पोहोचते. तसेच मधुमेही, उच्च रक्तदाब असलेले किंवा कोरोनानंतर योग्य खबरदारी न घेतल्यास पोस्ट कोविडचा धोका मोठ्या प्रमाणावर होतो.
त्यातच कोरोनाची लक्षणे दिसत असूनही अनेक जण चाचणी करण्याकडे दुर्लक्ष करतात. त्यामुळे अशा व्यक्तींच्या फुप्फुसांवर मोठ्या प्रमाणावर परिणाम होतो आणि त्याची कार्यक्षमता कमी होते. त्यामुळे श्वसनाचे विकार पुन्हा वाढतात. श्वासोच्छ्वासास अडथळे निर्माण होतात. काहींना दीर्घकाळ ऑक्सिजनवर राहावे लागते.
ज्यांना उच्च रक्तदाबाचा त्रास आहे अशांच्या हृदयावरही प्रतिकूल परिणाम होण्याचा धोका असतो. त्यामुळे छातीत धडधडणे, छातीत दुखणे, भरल्यासारखे वाटणे आदी लक्षणे कोरोनामुक्त झाल्यावरसुद्धा दिसतात.
नागरिकांनी कोरोनाची लक्षणे दिसू लागताच त्वरित चाचणी करून घेऊन उपचारासाठी दाखल झाल्यास वेळेवर उपचार होतात.
कोरोनातून बरे पण तरीही अनेक त्रास
- कोरोनातून बरे झाल्यानंतर योग्य खबरदारी घेतली नाही, तर अनेक त्रास होण्याचा धोका असतो.
- विशेषत: फुप्फुसांवर घातक परिणाम झाल्यास श्वसनाचा त्रास उद्भवतो.
- हृदयविकाराचाही धोका असतो.
पोस्ट कोविडचा धोका सहव्याधी आणि ज्येष्ठांना
पोस्ट कोविडचा धोका मधुमेह, उच्च रक्तदाब आदी सहव्याधी असलेल्यांना, ज्येष्ठ नागरिकांना तसेच उपचारासाठी वेळेवर दाखल न होणाऱ्या या रुग्णांना अधिक होतो. श्वासोच्छ्वासाची समस्या, छातीत दुखणे, अचानक धडधडणे, (एरिधिमियस, विकृती) आदी दीर्घकालीन त्रास होतात.
बरे झाल्यानंतर घ्या काळजी
- मास्क, सॅनिटायझरचा वापर, शारीरिक अंतर पाळणे या मार्गदर्शक तत्त्वांचे पालन करावे.
- गरम पाणी प्यावे, योगासने, प्राणायाम करावा. सिगारेट, मद्य आदी व्यसनांपासून लांब राहावे.
- पुरेशी विश्रांती व झोप घ्यावी.
वेळेवर चाचणी झाली नाही तर उपचाराला विलंब होतो. यातूनच कोरोनाचा आजार गंभीर होतो. कोरोनातून बरे झाल्यावरही फुप्फुसाची हानी मोठ्या प्रमाणावर झाली असेल तर श्वसनाचे आजार वाढतात. हृदयाचे आजारही गंभीर होतात. छातीत धडधडणे, अचानक छातीत दुखणे या विकारांमध्ये वाढ होते. सहव्याधी असलेले आणि ज्येष्ठांना अधिक त्रास होतो. त्यामुळे कोरोना झाल्यानंतरही शासनाच्या नियमांचे आणि डॉक्टरांच्या सल्ल्याचे योग्य प्रकारे पालन करायला हवे.
- डॉ. संघमित्रा फुले, जिल्हा शल्य चिकित्सक, रत्नागिरी
डमी क्रमांक : ९१९