राजापूर : कोकण रेल्वे मार्गावर सौंदळ येथे एका अज्ञाताचा मृतदेह आढळला आहे. मुंबईहून गोव्याच्या दिशेने जाणाऱ्या मालगाडीची धडक बसल्याने या व्यक्तीचा मृत्यू झाल्याचा अंदाज वर्तविण्यात येत आहे. ही व्यक्ती सुमारे ४० वर्षे वयाची असून, अद्याप ओळख पटलेली नाही.
याबाबत राजापूर पोलिसांनी दिलेल्या माहितीनुसार बुधवार, दि. २३ रोजी कोकण रेल्वे मार्गावर सौंदळ येथे एकाचा मृतदेह आढळला. सौंदळ पोलीस पाटील अनिल माळी यांनी याबाबत राजापूर पोलीस स्थानकात माहिती दिली. त्यानंतर पोलिसांनी घटनास्थळी जाऊन पंचनामा करून मृतदेह ताब्यात घेतला. मृतदेह आढळलेली व्यक्ती सुमारे ४० वर्षांची आहे़ त्याच्या डोक्याला व पायाला दुखापत होऊन त्यातून मोठ्या प्रमाणात रक्तस्राव झाल्याने त्याचा मृत्यू झाला. ही व्यक्ती सडपातळ बांधा, उंची सुमारे ५ फूट २ इंच, वर्ण सावळा, उजव्या गालावर काळा तीळ आणि अंगावर केवळ सफेद रंगाची लुंगी होती. या वर्णनाची व्यक्ती कोणाच्या ओळखीचा असल्यास त्यांनी राजापूर पोलीस स्थानक तसेच पोलीस उपनिरीक्षक एम. एल. मौळे यांच्याशी संपर्क साधावा, असे आवाहन करण्यात आले आहे.