लांजा : विहिरीत तोल जाऊन पडून ७८ वर्षीय वृद्धेचा मृत्यू झाल्याची दुर्दैवी घटना लांजा शहरातील शांतीनगर येथे मंगळवारी सकाळी घडली. रंजना लक्ष्मण कदम असे मृत्यू झालेल्या वृद्धेचे नाव आहे.
पोलिसांनी दिलेली माहिती अशी की, शहरातील शांतीनगर येथील शरद लक्ष्मण कदम (५२) मंगळवारी सकाळी ७ वाजता ‘आईला तुला औषधे घ्यायची आहेत. तू आराम कर,’ असे सांगून आंघाेळीला गेले होते. याच दरम्यान त्यांच्या आई रंजना या घराच्या मागील बाजूला असलेल्या विहिरीकडे गेल्या. त्यावेळी त्यांचा तोल गेला आणि त्या विहिरीत पडल्या. शरद कदम हे आंघोळ करून आल्यानंतर आईला खाेलीमध्ये बघायला गेले असता, ती कुठेच दिसली नाही. ते शाेध घेत विहिरीजवळ गेले असता, त्यांनी आत डोकावून पाहिले, तर आई विहिरीत पडल्याचे दिसले.
त्यांनी आरडाओरडा केल्याने आजूबाजूच्या नागरिकांनी धाव घेऊन रंजना कदम यांना विहिरीतून बाहेर काढले. औषध उपचारासाठी लांजा ग्रामीण रुग्णांलयात दाखल केले असता, डॉक्टरांनी तपासणी केल्यानंतर त्यांना मयत घाेषित केले. या प्रकरणी लांजा पोलीस स्थानकात आकस्मित मृत्यू म्हणून नोंद करण्यात आली आहे. घटनेची माहिती मिळताच, पोलीस उपनिरीक्षक प्रसाद जाधव, पोलीस हेडकाॅन्स्टेबल राजेंद्र कांबळे, भालचंद्र रेवणे यांनी घटनास्थळी भेट देऊन पंचनामा केला.